2018/04/20

原來做人男朋友真係好大壓力

002511e10c4016b6c6e105
 
網上資料圖片
 
話說呢個星期我好朋友英超職業女球證Sian Massey咪嚟咗香港交流做三場波嘅!咁我去英國佢照顧我,車出車入,照貼心!佢一場嚟到,當然由我車返佢四圍去啦!
 
佢嚟香港上堂、做波、分享、接受記者訪問外,我都有同佢去吓唔同地方玩吓。當中一定會去港島區,佢酒店位於沙田,我家住屯門,我每日由屯門出沙田再去港島或旺角咁啦!
 
我其實一直好期待佢嚟香港,因為我真係好鍾意佢,喺佢身上係學到好多嘢,相信呢個一定係交流重點!但當我呢個一睇就知係「揸車高手」嘅嚴重無方向感嘅女人,要全程照顧另一個自己好重視嘅人時!
 
我發現,個壓力真係好鬼大,我開始完全感受到點解咁多男朋友背住女朋友同班老死狂呻,照顧女友好辛苦。原來take care一個人,真係要花好多心思同時間,已經唔關你愛唔愛嗰個人住。首先要準時接佢,即係話唔可以懶床,大家都會識攰,接女友要提早出發,因為香港交通萬一塞車好大鑊。
 
當然我老死Sian好好唔會嬲我遲少少,但你諗吓嗰個換著你女友,你試吓遲,係咪會俾佢黑面黑鑊金?所以呢個係第一個慘位。
 
然後去唔熟路嘅地方,好彩Sian同我一樣,佢喺英國都唔太熟路,所以我哋會一齊研究點搵路,我個google係英文佢又會提我邊個路口轉。(題外話:大家有無試過高德,把女聲叫志玲,用咗兩次俾志玲水咗兩鑊,都係google好少少)但若然,兄弟你一路搵梗路時,你女友又埋怨你唔識路,又話你無用!講真真係好慘,搵路已好燥,行錯又兜咗唔知去邊!仲要有個煩人喺你旁邊,係咁觀音講經咁嘈住晒,唔識路又亂咁指,你都咪話唔慘!
 
我招待朋友都係十日八日,車佢返去再返家都好樂意,因為我明白佢真係唔會識香港交通,佢係作客嚟到,我當然會好好照顧佢,好似我去英國時,佢點都堅持車我去town買嘢!佢驚我唔識路!
 
但你女朋友,香港土生土長,唔知做咩事好似無腳咁,吓吓要你車,你開口叫佢自己搭車又話你唔愛佢!大佬你嘅時間就要俾晒佢!香港女仔十個有五個唔獨立,女人其實要訓練,真係搞到佢太依賴嘅話,只會辛苦自己。
 
Anyway,我經過呢個照顧愛人嘅十日後,我以後如果有男友,會體諒佢,其實男人都係人,唔可以對佢哋太多要求,每個人都有自己人生,最照顧到自己,只有你自己,兩性關係入面,假如吓吓要求別人去幫你,其實只會愈來愈唔健康!
 
羅碧芝 Facebook Page
www.fb.com/gigilawpg
IG: gigilaw1113

COMMENT