2018/05/31

歐聯決賽就好似人生咁

image
 
網上資料圖片
 
話說歐聯大戰決賽,我又廢廢地呢唔知醒,其實因為搭飛機出咗外工幹,個人都幾攰,由於酒店房好近樓下有酒吧,所以突然之間去到最後10分鐘,我就被歡呼聲叫醒,睇到3:1巴利個球衝力射球,然後就朦朦朧朧瞓返覺。
 
到第二朝起身嘅時候睇到好多Post鬧爆拉莫斯,咁我當然有睇片睇吓發生咩事啦!原來係一球五五波爭奪嘅情況下,佢疑似拉跌沙拿,搞到沙拿傷出,利記即時陣腳大亂,明明㩒住嚟攻都即時搞到無咗優勢。
 
首先利申我唔係利物浦球迷,我純粹睇波嘅啫,咁呢我就唔會睇相去斷定呢一球係有心定無意,因為相片係唔能夠足以證明到成個過程發生嘅經過!從片段中,有名宿球員話foul都唔洗foul,的確睇落都幾似no foul,所以呢單嘢好少人鬧球證,主要係鬧拉莫斯奸,同埋陰濕。重點已唔係去咗有無吹罰,講真吹罰咗都唔會俾到黃牌,亦改變唔到沙拿受傷事實,大家好了解呢個道理,所以主要係講拉莫斯有無心。
 
其實唔好諗住說服你身邊唔同諗法嘅人,因為覺得拉莫斯有心同無心根本就冇一個Model Answer,得當時人自己知!覺得佢有心嘅人係因為除咗根據動作之外,主要係佢過往嘅紀錄非常之唔良好,所以會覺得佢抱住一個壞嘅心態去做出呢個行為,傷害主力希望贏波。
 
就呢件事我想分享吓,唔知大家有冇試過撞車嘅經驗?撞車可能對大家來講,睇落發生得好快,我做乘客就試過比架的士攔腰撞落私家車度,當時睇住架的士撞埋嚟,心入面係諗到好多嘢,點樣去保護自己預防受傷。而做第二場超聯時,因為我跑跑下突然cut線又冇先兆,從後俾個球員撞到向前飛行六米,當撞個一刻,我知死梗啦今次一定會跌!
 
我12年球證生涯第一次俾球員撞跌,仲要向前飛嗰隻,空中時我同自己講,唔可以用手支撐落地,否則一定斷鎖骨做唔到落去,好彩我識打排球,我就用側滾方式落地避過咗一次嚴重受傷,當然有擦損晒但都執返身彩,仲做到埋之後70分鐘賽事。當日如果撞我個球員接觸後唔避,炒埋一碟我就無選擇空間就好似沙拿咁,焗住搵手支撐。成套動作做主導嗰個,一定會諗到點跌先保護到自己,咁你哋明唔明我想講咩?
 
就算人哋睇落嘅時間幾短,其實過程中係思考到好多嘢!雖然好多非利迷覺得賴地硬,其實換轉你嗰隊發生咁嘅事,評論一吓都好正常嘅!而且好多利迷都覺得個keeper屎。
 
足球有時真係如人生,頭3分1好景,會無神神出現衰人,搞到你跌落谷底,雖然你好努力,想爬返上去時又會做出愚蠢嘅決定,人生咪就係咁囉!但最重要,識欣賞自己一路走來唔容易,其實去到呢一步,已經贏咗啦!隊隊都想踢決賽,你估隊隊有得踢咩!
 
羅碧芝 Facebook Page
www.fb.com/gigilawpg
IG: gigilaw1113

COMMENT