2018/06/09

職場上最不恥嘅一種人

unnamed-21
 
網上資料圖片
 
話說做咗成12年球證,同大家一樣,初入行時咩都唔識,好正常啊!識嘅話就唔洗分級別,唔洗有考核,個個一嘢做超聯做世界盃啦。
 
入行頭幾年,同大家打工一樣,咩都唔識嗰陣,你係咪到呢一刻,學有所成時你會感激當初無睇你唔起,樣樣都親力親為教你嗰幾位前輩或上司?
 
你諗返轉頭,人哋無條件將識嘅嘢教你,你好似好理所當然咁,一句:「我係新人」!就好似所有嘢係應該,人哋教你同付出嘅都必需。
 
到出來社會打工,大家去到有返咁上吓年資,你開始有膊頭,到你去要協助人嗰時,你有無發現?身邊總有一類同事,著數佢就拎晒,到要佢幫返人時,就即時耍手擰頭,好似佢嘅時間就係時間,佢今日有咁高咁大,唔講以為當中無人幫佢無人提攜佢,佛系到佢無啦啦有呢個職位咁。
 
到分工要幫手協助人時,又借啲易呢樣唔得閒嗰樣有困難,佢有佢忙,你就好得閒,個個圈份份工都有呢類人,有威嘅時候就狗衝,有著數就要預佢,到要佢付出少少時就推三推四!
 
呢類人比起小人更不恥!因為縮骨無承擔,永遠非好漢!佢唔會諗吓當日無人教佢點會有今日,升職加薪就爭住要,洗人唔洗本,利用新入職嘅同事幫手就最叻!大家身邊係咪都好多無膊頭人?我發現年紀愈大見得愈多,細個都唔覺,真係要去到某個層次先識睇人,睇到邊類人自私到出汁,繼而不恥同呢類人講多兩句嘢呀!
 
打份工出糧養家避無可避,大家唯有一齊做好自己,做人做事對得住天地就算啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT