2018/07/20

足球係有灰色地帶

football grey area
 
網上資料圖片
 
世界盃決賽完咗啦!最後法國贏咗冠軍,大家嘅愛隊可能同我心儀球隊一樣提早出局,對決賽抱住欣賞或少少牙骹嘅心情去睇,好似邊一邊勝負都真係唔算太肉赤!
 
睇決賽當日,好多人都話法國係勁一班波,但就想克羅地亞創造歷史,然後睇住上半場就咁激烈球來球往,呢場決賽係好好睇嘅!
 
當然,轉捩點係當日克羅地亞嗰球手球,我見好多人又寫千字文分析係波打手或隻手係專登又呢樣又盛,或者我對球例太過認識,講真,你要用球例去講,但大家明明睇同一個動作都已有唔同感覺!講咩鬼呀?
 
我話你知,大家睇呢個動作係咪蓄意,就算球證界開100個小時高峰會議,都唔會有可能達到一個100%一致共識,而呢類咁灰色嘅情況出現時,事後就只能夠去檢討返當時做邊個決定係最合適。
 
而當時俾得12碼,係唔會預計到場波嘅結果會法國大比數勝出,所以,所有人嘅所謂中肯意見,都屬於馬後砲。「當時如果無判就點點點!」「判唔判都無力踢!」好多好多如果,好多道理喺一場波出現。
 
好多人想說服身邊嘅人,好多人係專家,其實我最想講,點解我鍾意做球證,個原因好簡單,因為真係好難做,而做得好,嗰份滿足感係超級大,但做得好係極困難,當中落幾多苦功,由於人心係有偏向,總會有人覺得你做得唔好。做球證,我真係學到好多嘢,亦感受到更多唔同人嘅個性。
 
人生其實咪就係要喺唔同嘅灰色地帶到拎個平衡!邊個角色都存在呢一種灰色,一個人愈叻,拎個平衡位咪叻囉!
 
羅碧芝 Facebook Page
www.fb.com/gigilawpg
IG: gigilaw1113

COMMENT