2018/07/27

BB來了,人生完了?

0AB55137-8CEF-44C8-AE32-9B9F44CD03D7 
網上資料圖片
 
好多,真係好多生咗仔女嘅朋友同我講,而家有夢去追好好珍惜,因為,佢哋已經無呢個能力同本錢。話說大台最近套電視劇好多人睇完都搵到共嗚,唔止生咗仔嘅會有,由於我身邊太多人的確有類似經歷,我見過幾個朋友產後抑鬱、產後唔愛老公只愛仔、最壞情況去到個仔得幾歲仲話要搞離婚!
 
真係咩個案都有,但問題其實有無得解決?我諗生咗個細路出嚟呢個事實已係無辦法去解決,由第一刻有咗,到十月懷胎出埋世,活生生一個人,點解決?根本決定生仔時就要好好預備,無足夠嘅心理準備,諗住見步行步嘅父母,大多數都會出事。
 
兩公婆來來去去嘈都係為錢,好老實你無仔女嘅話都仲可以財政勉強獨立,大家有份工,大家傾好屋企點分配開支其實都無咩問題,有無伴侶都係要生活。但一旦有細路嗰陣,所有嘢已唔存在獨立,仔女係真真正正兩者一齊擁有嘅一個生命,要負責任照顧好呢樣共同製造出來嘅嘢,不論金錢或時間,已唔再屬於你自己一個人擁有。
 
就正正因為責任感,所以好多人先提醒我唔好生仔,生咗就無晒自己無晒自由。同人生玩完無分別,只可將期望放落仔女身上。其實當人哋提醒我時,我有幾次都反問佢哋,你哋生之前,無人提過你哋唔好生?
 
答案當然有,但由於每個人懷住一份盼望嗰陣,就會將好多負面預計到出現嘅事情都放埋一邊,更加會覺得自己有能力應付同埋不幸唔會發生喺自己身上。開頭有擔心但諗諗吓會覺得捱到嘅,點知當真正失去所有空間,呼吸自由嘅空氣時,先真正覺得後悔。
 
其實好老實好老實,除非,真係對湊小朋友好有興趣,本身無咩特別嘢想追求嘅人,先好考慮生個小朋友出嚟!唔好諗住船到橋頭自然直,呢個世界無咁著數嘅事,唔付出照顧個仔但個仔健康乖巧,將來唔俾麻煩你,問清楚自己係咪真係有時間有心機隨傳隨到教育個仔,做得到好父母,先好生,否則唔好問點解悲劇發生喺你身上,香港無天生天養好耐啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT