2018/08/10

想喊就喊啦!

65f3df43-6fa5-4259-bc20-e3c6a4423964
畫作:方向明先生
 
最近情緒病嘅話題,相信大家都會討論,對於抑鬱、躁鬱、精神病,我哋普遍嘅人對呢幾種病嘅認知,的確好少,除非你身邊有人確診,甚至發生嗰個正正係自己,先會開始慢慢嘗試去了解。
 
最開頭認識抑鬱症相信係好朋友生完BB,由原本一個好正常開開心心嘅女人,會變到好失去理智,好暴躁,會經常喊,開頭唔理解,被鬧埋一份,自己都覺得好委屈,有諗過生完小朋友大晒咩?但因為係好朋友,開始了解佢,佢講出自己內心控制唔到自己情緒嘅過程。聽到後覺得好可憐,即使冒住被鬧到狗血淋頭,我同一班好朋友都決定陪佢渡過難關。
 
但朋友係咪真係可以24小時睇住,事實唔可以,所以屋企人支持係好重要,同一屋簷下,要忍耐、協助、體諒同理解等等,就係因為有個好老公,呢個朋友真係好番晒,睇見都好開心。
 
我唔係專家,我唔知有咩最實際方法幫到人,但我試過因為失去咗最心愛,陪伴我11年嘅小狗,我感覺到喺抑鬱症嘅圈圈外徘徊咗好一段日子,好接近好接近。
 
平時我係一個好開心嘅人,因為我有唔開心,番到屋企見到小狗就成為我嘅避風港,有佢就咩關都過到。但佢臨走嗰幾個月,被病魔折磨到已經非常虛弱,抑鬱嘅心情已經開始每天發芽,直至喺我懷中離去,我感覺到有一股巨大嘅黑色力量將我拉住。
 
好記得佢走咗嗰晚,我最好嘅朋友自己嚟搵我,留底陪咗我成晚,我好驚我嘅情緒影響人,但佢鼓勵我喊,想喊就喊,佢唔介意我不斷排出負能量。
 
雖然我好熱愛運動,平日好正面,原來遇到唔同關口,呢一件事我好重視,面對生死,如果當晚無佢,我真係唔知跳掣後會做咩嘢。
 
呢段咁黑暗嘅時間持續半年,呢半年有好多朋友陪我,最重要佢哋有個同理心明白我重視嘅嘢!唔會因為覺得:車,死咗隻狗咪買過隻囉!
 
大家嘗試放底自己處理事情嘅方式,唔好教你好朋友點做點做,試吓理解佢嘅感受,因為當你唔開心時,都想人理解你,係咪?
 
羅碧芝 Facebook Page
www.fb.com/gigilawpg
IG: gigilaw1113

COMMENT