2018年08月26日

對《莎木3》仍然有期待

曾經係風雲一時嘅世界首個FREE(Full Reactive Eyes Entertainment)類型遊戲《莎木》,當年響Dreamcast推出導致唔少人出機。99年中學雞嘅我雖然DC一早已買,但VF3同Sonic都視為前菜,真正期待嘅係年底前出嘅莎木。仲記得響中學同朋友喺GAMESTOP排隊買嘅情況。畫面上當然震撼,但最鍾意係響遊戲裡面嘅虛擬橫須賀探索冒險,可以搵路人傾計,可以去神社探貓,連去機鋪打機扭蛋都有!所謂FREE唔止係眼睛想旅行咁簡單,而係模擬住響一個80年代日本小鎮果種感覺,雖然唔係完美毫無缺點,但真係好佩服鈴木裕細心嘅程度。故事同角色設定係同無線劇一樣老土,無壯大世界觀或者魔法變身等等,不過偏偏就係好多細微位令到呢隻遊戲唔可以同一般RPG比較。當時機友們都未被寵壞,日本遊戲無中文版係理所當然,咪落街買本小說式攻略囉。後來出二章時DC前景已經危危乎,心捻咁之後果九章點算?

Screenshot 2018-08-26 18.18.16

2015鈴木裕響網上宣布成功向SEGA爭取莎木遊戲版權,正式以眾籌形式開發莎木3,十五年啊!Virtua Fighter都出咗兩代,當年唔少中學雞而家個仔都準備做小學雞喇。Ubisoft夠時間出15隻刺客教條加DLC喇我dls!本來以為普天同慶,但係觀眾眼睛係雪亮嘅。而家唔係世嘉而係你同我做鈴木裕個老闆,你想我投資,俾到我啲咩貨色先?果然睇過初公布嘅畫面後,評語好壞參半。雖然針對畫面差呢個點好似有啲不公,但的確而家睇到嘅淨係得果段表情僵硬嘅演示片嘛,畢竟十五年來出過太多好遊戲,如果唔係鈴木將自己個名都撻埋出黎,分分鐘個kickstarter都籌唔夠最低金額。

 

前幾日好開心買到莎木1+2中文重製版,終於唔駛靠攻略喇!同時莎木3終於推出有期,剛好就係1+2重製版推出嘅一年後。講到尾,我發現自己仍然係對莎木3充滿期待。仔細捻清楚,亦唔係完全由於兒時回憶逼使咁簡單。我當然想知道芭月涼同玲莎花最終發展會如何啦!等咗咁多年,唔好話斷尾,就算爛尾我都想了咗個心願。二來就係玩過1+2嘅中文版,投入度大增令我重新愛上呢個系列,想了解所有遇到嘅人生命裡面嘅故事,同埋主角背景等等。再講,而家家用機機能真正可以做到FREE呢種遊戲體驗,我好想知道鈴木會唔會將當年因為技術/資源所限而無用到嘅想法都放響第三章,做一隻佢等咗十五年終於做得出嘅作品。同埋當然唔少得而家聽番仍然係遊戲界裡面數一數二經典嘅莎木配樂,主題曲裡面帶有濃厚中國風嘅悲壯感覺,《莎花》果把溫柔滄桑嘅女聲,我好少對遊戲配樂有期待,但呢隻絕對屬例外。

 

最後一點,係俾面世嘉的。雖然對於當年DC生不逢時有啲可惜同感嘆,但我肯定自己唔係唯一一個響呢部機上面消磨過好多快樂時光嘅玩家,身邊嘅機友亦好少聽到有人後悔買咗呢部世嘉背水一戰嘅最後主機。慶幸嘅係SEGA爭氣,又或者話肯吞下呢口氣,接受現實並繼續為其他主機開發遊戲,唔係的話今日都無人中之龍玩。

 

(手機用家請按此:https://www.youtube.com/watch?v=3dC5PLrUIZY)

 

(手機用家請按此:https://www.youtube.com/watch?v=UweI4Ra2QbM)

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年08月19日

Biohazard 2 Remake 用心炒好呢碟飯

(桌面用戶請按此:http://blog.menclub.hk/johnk/?p=789

 

 

今年E3公布嘅生化危機2重製版,賽後被譽為Sony發佈會其中一個大驚喜(Death Stranding gameplay影片唔算,因為一早講定會show)。Capcom「冷飯王」呢個朵一洗頹氣,重新獲得老餅擁躉嘅愛戴同期待。BH2 Remake亦係自2002年Gamecube版一代Remake之後最落本炒嘅冷飯,說明只要揀啱材料,冷飯未必一發佈就俾人話公司有心搵水籌年尾花紅。

 

Screenshot 2018-08-19 22.38.13

 

繼續閱讀»

Read More
2018年05月20日

虧玩大阪2018!?

Screen Shot 2018-05-20 at 8.46.44 PM

 

 

好似無幾耐之前先講完東京,最近又思鄉症發作,去咗大阪五日。相比起最多人選擇去嘅東京,關西又係另一番風味。

 

大阪感覺同東京最唔同地方:

- 大家可能覺得東京係人流頻密,車流更密嘅城市,但我對大阪嘅印象反而係逼過東京。可能因為所有嘢無論商場,餐廳都細一個碼,所以就算旅客量一樣多,響大阪都塞得密啲
- 講到食飯,今次其實唔太可以作準,因為好多餐都虧住黎食,下面解釋⋯不過總括印象比東京好,應該話好容易就搵到好嘢食
- 但係買嘢方面就無得比了,唔係無新嘢買,但有都只係得果幾個地方有。亦無機會見到類似東京原宿街頭咁有代表性嘅店,遊客店居多。畢竟大阪出名嘅唔係走在潮流尖端
- 想買中古games,有超薯。不過選擇同價錢都未見吸引

 

繼續閱讀»

Read More
2018年05月10日

God of War – 我無做癲佬好耐喇

家用電子遊戲從八十年代開始起飛,細個玩過PONG果代基本上可以講係元祖玩家。彈完波就撞磚,撞完磚就撞人,「邊行邊打」從而成為其中一個最易獲得機迷歡心嘅類別。雙截龍,Final Fight,雙打就更加熱血,忍者龜四打直頭爆機後要大家搵棵桃樹舉杯結義。唔少血氣方剛嘅小學雞就係從呢個時代開始同遊戲機結下不解之緣。當進入青春期,發現有女仔呢種生物嘅存在後,有好多人轉移投資目標,但心裡面仍然有一份撩交打嘅心態,只有動作遊戲能夠滿足。

 Screen Shot 2018-05-10 at 8.22.40 AM

後來時代發展,科技進步,遊戲設計同題材從保守(太難怕你班人唔識玩)去到更放膽,天馬行空,用腦用埋四肢(驚死你話太易玩)。齋打打殺殺越來越唔盛行,要睇睇故事講乜先,有無收集元素先,有無得組隊打先。

 

經過GTA,Witcher,Batman Arkham等系列嘅寵幸,一隻動作遊戲有「比得上電影的戲劇性」「全開放式版圖」「超大逼力boss戰」「超耐玩角色武器成長系統」似乎已經係指定動作,就算有齊你隻game都未必保證成為百萬大作。響呢個沒隔幾個月就有經典作品被完全重製嘅時代,要跑出絕對唔易,分分鐘連個二十年金漆招牌都打爛。製作團隊Santa Monica Studio深明呢個道理,而且知道出色嘅美風動作遊戲市面上已經去到飽和程度,要殺出重圍一定要較啱角度同觀眾心思。

 

做開老豆嘅男人未必會再成日發夢做英雄,因為本身每日已經做緊,但做慣英雄嘅男人總有一日會想收爐收火,學習做個好老豆。Tony Stark自己都咁講啦。新GOW三位故事編劇Matt Sophos,Richard Zangrande Gaubert同Cory Barlog就係睇中你班細個無血不歡,爛命一條,遇神殺神嘅七十八十後熱血男兒,而家都開始收心養性,了解家庭嘅重要性。所以呢集嘅主題就誕生了,看似係Kratos教子成長,其實真正成長果個係曾經係冷血鬍鬚佬自己,因為佢要學識為別人而活。當中經歷仍然出現唔少「拳頭」,但就無咗「枕頭」。年輕嘅玩家會著眼動作流暢,北歐風敵人設計精細,個仔嘅AI做得幾好而且合作解謎等元素。對於同故事有深一層共鳴嘅中佬就會好欣賞光頭佬同個仔共同進退共患難嘅親子情,每一次Atreus問老豆我做得好唔好呀,老豆簡單點點頭呢啲位。本身已經係紮實嘅一隻遊戲,再以人性化嘅演繹方法黎講故事同主角成長,呢個就係GOW成功重生嘅原因。

(手機用家請按此:https://www.youtube.com/watch?v=_IpLMofcNKM&t=2359s

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年04月28日

我的Rampage

Screen Shot 2018-04-28 at 5.12.11 PM

見到《末日困獸戰》第一個反應就係「咁都開到戲?」,第二反應就係「又係The Rock?」感覺好似剛剛先睇過套又係有電玩同Dwayne Johnson嘅電影,捻真啲先記得係上年套《逃出魔幻紀:叢林挑機》。

 

「猩猩拆樓」我記得細個響某兒童場玩過,以為係好似Donkey Kong咁打猩猩,原來自己做破壞果個。雖然唔係太吸引但都成功練成連打好手,仲有得捉人黎食。不過記憶中Rampage呢隻遊戲好似無乜交代故事。個主角內心掙扎係點?有無潛台詞?結局係咪發人深省?

Rampage_screen1-600x375

其他人唔知,我自己睇《末日困獸戰》就睇得好過癮。呢個世界係需要呢類唔需要用常理解釋,甚至睇到最後已經唔記得開頭,只求果兩小時內令人覺得熱血過癮嘅電影。其實有好多恐怖/暴力B片都係用呢個方程式,例如Sharknado系列,不過始終唔係荷李活製作,至少特技方面會令你發笑多過嘩一聲。同時又需要有The Rock咁嘅型佬坐鎮,個氣氛先圓滿。

 

Wes Anderson嘅電影會令人覺得「好靚」,Christopher Nolan嘅電影就「好精」,《Rampage》如果令入場觀眾覺得「好癲」其實已經成功咗。就正如King Kong點解會入咗哥斯拉個世界同佢隻鞦,原因無所謂啦,你想唔想睇先?

 

打機亦如是。我有個朋友從來唔打機,有日話想買部PS4。問佢想玩咩game佢話「射射射,殺殺殺,簡單就好」,結果買咗Battlefield,故事全skip一味掃射,掃到眼訓就關機。身邊鍾意玩三國無雙嘅好多又係純碎追求搵更強大嘅武器,用更強大嘅力量黎做低同一班人。大佬啊出到第八集,黃巾之亂我用手語都可以將個故事倒敘俾你。但呢類不求思考只求痛快嘅遊戲絕對有市場嘅地位,畢竟唔係個個對打機過程中想得到嘅嘢係一樣。

 

黎緊又有得睇The Rock玩命片《Skyscraper》,今次仲著住義肢跳樓。我期待入場,我個腦亦期待可以放兩個鐘假。

(手機用家請按此:https://www.youtube.com/watch?v=c2UoNxst6J0

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More