2018/02/12

芒亨晚年,你我有責

Screen Shot 2018-02-12 at 9.07.02 PM

2018未到過年,一眾機迷已經忙到不可開交。先有SFV街機版,手提機星之卡比,然後銀魂亂舞,一月尾更係Monster Hunter World,龍珠同FF Dissidia連發。執筆之時好多人已經爆晒MHW玩緊(笑緊)無雙八。如果計埋冷飯就加多隻汪達巨像。當然響香港日本兩地,最突出一隻非芒亨莫屬,呢個品牌本身已經有大量死忠,呢次除咗跨平台推出之外,最重要係差不多一面倒好評,無論出售量同平均評分都係其系列作品中最高。

 

我玩得慢,一來最近好忙,二黎慢慢嘆,反正單機都十分過癮。唔好問我識唔識刷古龍,或者HR30後如何升裝,全部未玩到。不過我已經充分感受到今集同以往相比嘅過人之處,亦明白點解咁多人忍到今年都未買PS4嘅都走去出部Pro機。首先顧名思義,叫得魔物獵人「世界」,再無跨區loading之說,真正成個世界你望得見嘅地方都一口氣去到。之前要load係預咗,所以從未想像到成個感覺差咁遠,一個字「爽」。十幾種武器可供選擇,鼓勵玩家嘗試研究唔同戰術,成功搵到boss弱點而終於戰勝嘅成就感亦加倍。組隊時如何安排各人嘅裝備互補不足就變得更加重要。新要素當然仲有排數,但最終俾到我嘅結論就係今集將芒亨遊戲最令人中毒嘅核心玩法:獵>收集>強化合成,發揮得淋漓盡致。二月放大假,有呢隻看門口真正可以芒亨晚年,邊度都唔駛去。

 

 

比較少人講嘅係,大家響Facebook放屠龍片時都唔記得tag番句#多謝Capcom。只係一個月前,網上討論區一提起Capcom通常都係圍小佢「冷飯王」,「淨係識搞街霸」。要知道人地今次成功,唔只係百屌成材咁簡單,更絕非僥倖。廠房一直收集眾MH玩家意見,保留系列受歡迎元素之餘亦改良令老手同新手卻步嘅地方,務求令新舊fans都可以玩得開心。加上籌備beta,再改良,加強server穩定度等等,全盤計劃用咗起碼兩年走唔甩。咁人地呢段時間養住咁多個員工,個個都要食飯㗎。錢係點黎?咪靠賣吓冷飯,出吓手遊咁。當然,我對於Capcom嘅財政情況完全唔了解,可能人地超叠水。但我明白開發遊戲,尤其一隻有質素嘅遊戲,絕對需要大量耐性同資源。今時今日好多廠都係抱住「出咗賺頭水先算」嘅營運手法,結果係就係密密出,但隻隻都係次貨,帶壞成個遊戲業生態。

 

大家如果對家用電玩界仍然有希望,對未來大作嘅期待唔想落空,新一年記得積吓口德喇!講到尾,Capcom同玩家雙方嘅final boss都係同一個,叫「錢」。唔好因為錢而傷感情喇。

 

(以上言論不適用於Konami)

G3YwD

(Image from 香港網絡大典

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

 

COMMENT