2018年08月17日

《論遊戲--單機沒落》

16e14021-2e21-4c18-987c-9fccb2c7c3de
 
網上資料圖片
 
單機遊戲,曾經係遊戲界嘅霸主,直到今日,單機遊戲,已經成為一個推廣嘅賣點:難得一見嘅單機遊戲。
 
喺網遊、手遊、課金制之下,單機遊戲營利模式成疑,一隻三百到四百嘅遊戲,單機係一個One Off購買,買完,就完結,唔似得網遊手遊課金制,可以長期喺玩家身上挖出金錢,再垃圾嘅網遊,都總有一班瘋狂土豪課長,用萬計嘅金錢投放,一個,頂你一百個,你只需要令呢班土豪高興,就有源源不絕嘅錢送上,點令佢高興?就係用無課、低課玩家去滿足,最後無平衡可言,為爽而爽。
 
今日仲有乜公司肯投放單機遊戲?通常都係傻得緊要嘅人。
 
做一款單機遊戲,你要有劇情、玩法、體驗、驚喜,唔似得現時一式一樣嘅手遊,基本上換湯不換藥,做任務、升級、抽蛋、卡關、課金、無休止循環,劇情?重要咩?大家都係飛住去,自動升級、掛機、尋任,好多人玩完都唔知呢個遊戲世界發生咩事,完事之後,再搵另一隻類似遊戲再玩。
 
單機遊戲唔同,你可以長時間去體會遊戲世界,唔需要同人競爭,唔需要衝等,更唔需要抽卡,無限時間比你去發掘遊戲樂趣,所以每一個環節都唔可以隨便。
 
經典單機遊戲好似仙劍、金庸、FF,都有佢特別嘅遊戲方式,幾年磨一劍,你永遠都會記得個故事,愛上個主角,但今日嘅遊戲,有幾多會留喺你心入面?都只係過客,一個比你花時間花錢嘅工具。
 
單機,總係美好,因為係一種純粹,小情侶喺房入面互訴心事,唔需要交友應酬洗費,你可以深入去了解大家,但就好似現今社會咁,初戀,已經買少見少,要搵你都唔知去邊搵,搵得返,你又會唔會花時間促膝長談?定你已經係一個只會走程序,直接肉搏嘅成年人?
 
遊戲世界變,我哋都變,去唔返以前,沒落,總有原因,雙方都有責任。
 
突然諗起《喜劇之王》入面搵初戀嘅老闆,我只係想搵隻好玩嘅Game,錢我大把,但埋嚟嘅只係一班想我課金嘅臭雞,一班庸脂俗粉著套校服就扮初戀?摸手俾錢、鍚又俾錢,要有遊戲體驗?全部都係付費體驗!我知,初戀難求,但呢班明顯係出嚟昆水嘅,俾返少少演員職業道德都無,我想呃自己都呃唔到啦!
 
蔣薇
www.fb.com/maydreaming

Read More
2018年08月10日

《神級Sales的鍊成之路》

E2361131-F9F2-4DF7-822B-E78DCEE7F16D
 
網上資料圖片
 
咩叫年輕,就係有脾氣、有原則、有堅持、有攬炒嘅準備。
 
有個女Sales同事,俾個客投訴佢做錯嘢,好合理地上演咗一場羅生門,客話佢有錯,佢又話客講大話屈佢,站喺公司立場,客當然大過同事,而且佢又好年輕咁少少Black and White證據都無,解決件事唔難,公司蝕少少,但最大問題係點樣去處理呢位女同事嘅情緒。
 
「件事解決咗,等陣你打返去同個客道個歉,話可能當中有誤會啦。」
 
「我唔覺得有誤會,明顯就係佢講嘢唔算數,依家仲要屈我。」
 
「如果係佢屈你,你打去道歉佢就會心知欠咗你;如果佢真心覺得你錯,佢都會無咁嬲。你唔認錯的話,就會無咗個客。」
 
「我無錯,我唔會打比佢,更唔會道歉。」
 
佢講完,仲眼濕濕咁,好年輕,好懷念呢種青春,我歎咗口氣話,唔緊要,你冷靜吓先,慢慢諗啦。
 
事後幾個有番咁上吓年紀嘅同事都覺得好少事,猛虎落地勢,大家都已經駕輕就熟。
 
有個男同事講:「知唔知點解我哋可以成為神級Sales?咪就係俾自己女朋友或者老婆訓練出嚟!道理?邊個理?總之我話你錯就係你錯,道歉啦!道歉啊!家陣唔係叫你講道理,我要嘅只係道歉!久而久之,男人個膝頭已經無堅不跪,一日一小跪三日一大跪都輕鬆自如。」
 
「仲有啊,個客再麻煩,啲嘢搞好耐都唔得,成日話得得得,咪好似等女人化妝出門口咁,你只需要一句,唔急,你慢慢,有嘢幫手出聲;而你明知時間好急就嚟仆街,你要溫柔咁提醒,唔好俾壓力佢,最後遲到要搭的士,咪搭囉。只要你有一分唔耐煩,一分壞話,就係你錯。」
 
「客,要好似公主咁縱,你要令佢再離唔開你,出名所有男人都怕咗佢,到時,嘿嘿,佢嘅一切都喺你掌握之中;等你有錢,有勢之時,而佢青春不再,你再喺出面搵到個大客時,咪就係拋棄佢嘅時候。」
 
一個二個,講到好有同感,突然覺得女朋友嘅難頂,都係一種磨練。
 
致所有在職男士,無論你喺職場遇到幾難頂嘅事都好,諗一諗你屋企個老婆,一切難事,已經算唔難過了。
 
至於背後邏輯係點,就你哋諗喇。
 
蔣薇
www.fb.com/maydreaming

Read More
2018年08月03日

《bb來了,男人的噩夢》

download-1
網上資料圖片
 
最近有套BB來了喺媽媽界瘋傳,嘩,好到肉啊,我奶奶就係咁,我老公一模一樣,媽媽睇到喊,男人係旁邊睇係點?係驚啊!!!!
 
我知,做人阿媽要付出好多,亦會日夜擔心,但望到套劇入面,老婆老公開波、老母老婆開波,老母外母開波,集集都世界大戰,男人睇到,生仔?有了你頓覺輕鬆寫意?輕乜嘢?寫乜嘢?想生仔嘅都要停一停諗一諗。
 
當一班媽媽自High時,又有幾多人知道男人諗緊乜,大家都知某台主要客路係主婦,主旋律係點,要取悅邊個一目了然,就好似抗日神劇咁,主角永遠係正確,全世界都要圍住佢走,最後身心舒暢,繼續做返一個好媽媽,Fighting!
 
有一次同兄弟剛剛睇到一集,講到男主角準備咗一堆嘢慶祝周年紀念,幻想很美好,現實返到去即時被老婆屌,話佢嘈住晒BB瞓覺,即時兩個男人都覺得,呢個女朋友、老婆,已經進化成人哋老母,同你無乜關係。
 
調查指出,當夫妻有小朋友之後,變質同出現問題機會大增,點解?因為媽媽天生嘅偉大,令佢唔再覺得其他身份重要,一切都係BB最緊要……
 
男人點諗?佢係一個爸爸,亦係人哋老公,更係人哋個仔,一個人有好多角色,即使加多個Title比你,都唔會影響你舊時嘅職務,因為呢個唔係升職,而係兼職,可惜,有部份女人,嗱,我話部份咋,佢哋唔會兼顧幾重角色,一次只可以做一樣嘢,做完人老母之後,就唔再係你老婆喇。
 
曾經有個朋友佢好勞氣,因為佢想同老婆去旅行二人世界,但老婆就話要帶埋個小朋友去,一個人去旅行係放鬆,當你帶老婆/女朋友去,都已經要遷就好多野,玩得無咁開心,而當你帶埋小朋友去,嘿,你會覺得返工仲開心,有冇發現當你帶小朋友去旅行時,你已經唔可以再享受個旅程,相機入面係小朋友嘅嘢, 而行李入面都係塞滿買比佢哋嘅嘢。
 
你可以話,喂,咁有小朋友,有另一樣開心姐!係,我無話唔開心,但你食得多米芝蓮,你有時都會想食雲吞麵卦?但你可以同我講,呢樣都係可以食,大佬啊,係飽,但唔同味嘛!
 
奉勸廣大男士,生仔之前諗清楚,你好有可能會無咗個老婆,無咗個阿媽,最好大家傾清楚先好生。
 
女人成日講,呢個小朋友你都有份,點解你可以咁唔緊張,咁無責任,係,呢句真係好無敵,你一駁,你就唔係一個好爸爸,你就會上BE俾人聲討。
 
忠告:生仔責任好大,而呢個責任你可以唔負的,就係你選擇唔生。
 
蔣薇
www.fb.com/maydreaming

Read More
2018年07月27日

《靚仔大晒》

741B1A78-32B5-42F8-AB95-25687441D4C1
 
網上資料圖片
 
某電視台搞咗個選秀節目,咁好彩俾我睇到一幕眼火爆嘅情節,真係唔出聲唔得。
 
一個靚靚仔仔咁嘅參賽者出現,介紹咩?人如其名,跳舞唔得、唱歌唔得、演戲唔得,而佢表演選擇咗唱歌,一唱,簡直驚為天人地難聽。節目入面其他參加者、評判、主持全部面容扭曲,大佬啊,你唔識唱歌可以選擇做其他嘢,點解要折磨我哋?
 
五票,得一票比佢留低,好合理,鬆咗口氣,好正路,但突然佢唱完歌,多一票,又多一票,最後入圍,我心中粗口橫飛,做馬啊?你哋係聾嘅就睇醫生啦!聽到佢哋解釋,話佢唔唱歌咪幾好幾靚仔,俾佢入圍,嘩,原來靚仔大晒!
 
靚仔係一個長處,係優勢,但你哋係選秀節目啊!靚仔就得,不如唔好表演,就咁行出嚟轉個圈,然後擺Post決定入唔入啦。要人表演,但一場垃圾表演偏偏入圍,公道咩?食屎啦!仲話「造星」,咁嘅人咁嘅星,憑咩?
 
咩係星?有邊個「星」係憑樣就可以行出嚟?係啊,係靚仔啊,所以咪停留係靚仔階段,要造星,你可以造到咩星?
 
娛樂圈點解死?咪就係有班人覺得靚仔大晒,搵班靚仔靚女行出嚟跳舞唱歌,咁就係星,咁就有人喜歡,但呢種得個樣嘅星,又可以留到幾耐?
 
唔識唱歌就做其他嘢,得個樣你都可以用個樣去展示,你行出嚟笑吓,chok吓,咁都叫知自己有乜料,賣靚仔唔係罪,但你唔識唱歌仲唱歌先係大罪。唔好話星,就咁講做人,你無可能唔知自己長處同短處,將個弱點曝露出嚟算係點?即係佢無腦囉!
 
對於呢班所謂評判,我真係好有保留,究竟佢哋有幾專業,而係佢哋手下誕生嘅星,又係一顆點嘅星。
 
有朋友講,佢好討厭明星,但好喜歡結識有才華、有技能嘅人,呢個睇法好難得,一班又一班「明星」,有幾多個真係會令我哋想追捧?
 
知唔知咩係星?星嘅閃耀係由數百萬光年外嘅一座星體反射過嚟,當你望真少少,佢係一個生態,一個未知,一個世界,只需要發光就係星?唔好意思,你只係一盞燈咋,無人會去探究一盞燈,因為你內涵有限。
 
可惜,今日好多人都將燈當星賣,結果唔夠一陣咪燒囉!
 
蔣薇
www.fb.com/maydreaming

Read More
2018年07月20日

《兄弟的分離》

bros
 
網上資料圖片
 
人生係一種過程,由無,到有,再失去,朋友亦由無,到有,再分離。小學中學畢業總要面臨分別,大家喺紀念冊寫上最真誠嘅祝福,大家有自己嘅新環境、新朋友,但亦限於香港,一個電話,「旺地恆」等,要見,唔難。
 
細細個九七時,好多人都話移民,舉家搬遷,二十年後,終於輪到我哋呢輩。
 
當我聽到一個兄弟突然來電約我食飯,席間佢話,佢要移民去加拿大,唔係唔返香港,但一年唔知有冇一兩次,我無言以對,只可以祝佢一路順風,諗起以前夜晚無聊可以搵佢喺公園飲酒吹水吹一晚,失戀升職加人工都會搵佢傾訴,而佢即將去一個好遠嘅地方,唔係再可以一個電話搵到佢,生日亦只可以遠遠祝賀,距離唔再係一個半個鐘嘅車程,而是差唔多十二個小時嘅時區。
 
科技發達,要搵人WhatsApp,Facetime都可以,但朋友同兄弟,係要見的;唔見,再熟都只會淡,會遺忘。
 
仲好記得讀書嗰陣,我哋話等第時買樓要買旁邊,打機睇波吹水都可以行過隔離㩒鐘就可以,但呢個城市嘅樓市,唔好話住隔離,連買樓要住同一屋苑都唔係易,大家都無再提起呢個孩時戲語。
 
送佢機一刻,幫佢推住行李,去到入閘口,我心裡面有句說話無講:「其實我哋仲可唔可以好似以前咁。」句嘢太HEHE,我講唔出口,同時亦好清楚個答案係點,一切都返唔到去以前。
 
我只係講:「我結婚,返嚟做伴郎啊!」
 
佢笑咗笑:「好啊!」
 
結婚前,我同佢講,你記唔記得我哋嘅承諾?佢話記得,但佢行唔開,唔好意思。我回佢,唔緊要。
 
直到結婚當日,兄弟團比想像中多咗一個人,係佢。
 
「又話行唔開嘅?」「突然又行得喎,哈哈。」一個擁抱。「多謝晒。」「客咩氣。」
 
我突然明白,世事無常,你捉唔住要離開嘅事物,但你可以換過一個模式去延續,唔可以再出嚟吹水飲酒,但間唔中一句問候,就變成一種新嘅關係。
 
友情常在,友情,無一種固定形式,男人,一切在心中。
 
蔣薇
www.fb.com/maydreaming

Read More