2018年06月23日

《冰島的快樂足球》

unnamed-2
 
網上資料圖片
 
足球,對於香港人嚟講,係最熟悉,亦係最陌生嘅運動。唔少人踢波睇波,但唔係為自己地方而踢,亦唔係睇自己地方嘅球隊,英超、西甲球隊球員如數家珍,但香港本土嘅又識幾多?
 
點解一個連沙田區人口都唔及嘅國家,可以踢到世界杯,而香港只可以為他國而歡呼?
 
香港係一個咩都講錢嘅地方,足球?係娛樂,但無人會當佢係職業,因為大家都知搵唔到食,而有班專業足球員以此為生,但又得唔到重視,旺角場入座有幾多人?而入面有幾多人係專門入去屌人老母?
 
我諗全世界無一個地方嘅人好似香港人咁睇唔起香港人,其他國家做乜都比自己高尚,而自己友就一概唔撐,好似之前「香港好波」系列咁,大家喺Facebook講句好波,因為可以呃like嘛,一年過後,仲有幾多人去支持?無Like,不了。有人話政府無支持係主因,講真,大把落後地區都無政府支持,但佢哋都可以踢到好波,因為人哋無我哋香港人咁涼薄。
 
一個正職係導演嘅門將,佢可以面對全球身價最高嘅美斯,仲撲出佢一球十二碼,全數球員、球迷都為之歡呼,睇冰島踢波,佢哋好貼地,因為佢哋無將自己放得高高在上嘅「職業球王」,反而係一班參加比賽嘅選手,佢哋唔知幾時出局,亦唔知自己可以走幾遠,但佢哋仲可以開心面對,從佢哋可愛嘅入球動作就可以知道,佢哋仲係足球中得到快樂。
 
當興趣變成職業時,快樂便會慢慢消失,有人話,入球係工作一部份,正如郵差唔會為自己派到信而歡呼一樣,但你將足球變成工作,唔再為此歡呼,咁你亦得返錢同壓力。
 
或者冰島呢種由有正職嘅人踢國家隊,大家唔會對佢哋有好大期望,反而造就出一種興奮,差唔多十分之一嘅國民去咗支持自己國家,贏咗開唔開心?當然開心!輸咗又會唔會嬲?唔會,反正都超額完成。
 
同香港足球最大唔同係,冰島足球無論贏輸,都係一件開心事,球迷都會繼續支持。
 
香港呢?先唔講國家或民族意識,連一個地方嘅凝聚力都唔夠,點會快樂,點會成功?
 
話你知香港人幾時最快樂,就係當自己支持嘅球隊贏波,而自己馬會帳號有錢收嗰一刻,足球?同馬一樣,邊隻贏,咪叫邊隻囉!
 
蔣薇
www.fb.com/maydreaming

Read More
2018年06月16日

《做暖男?不如做個真男人!》

"Starbuck" Day 06 Photo: Jan Thijs Caramel Film
 
網上資料圖片
 
暖男,係依家時興嘅新Term,成日話物化女性,但其實暖男咪又係女性心目中對佢哋有利益嘅模組。
 
有次我搭巴士,有人漏咗銀包,然後有個男乘客同司機講停車,再衝落去俾返銀包對方,大熱天時佢一來一回,司機好彩有等佢,見到佢成身汗返上嚟時,若無其事咁坐返係度,已經唔係暖咁簡單,而係熾熱。
 
暖男同真男人分別係,暖男只不過係充斥對兩性關係中有利嘅行為,而真男人嘅溫柔體貼,係全面性,唔係你係我條女我對你好,而係對有需要嘅人提供幫助,一種美德,一種大愛。
 
仲記得有次同女朋友行街時,有個阿婆佢推緊手推車上斜,推得好辛苦好慢,我鬆開女朋友嘅手,走向阿婆身邊,一手幫佢推上去,成個過程完事後,女朋友攬住我話覺得我好Man,當時我無諗得太多,只係覺得自己有能力咪幫下,無論係邊個都會幫。
 
暖男嘅局限性太低,好似小乘佛法同大乘佛法嘅分別,暖男幫嘅係指定人士,好似有好多有異性無人性嘅粉腸咁,對女朋友就好到不得了,但對外人對朋友就斤斤計較,對於呢種「暖男」,我通常都係一笑置之,心諗,你暖又關我乜事,反而呢種個別「暖蛋」令我好感受到親疏有別,你愈暖,我係旁邊睇就愈凍。
 
厚此薄彼嘅男人,唔係真男人,更偏向一種高明嘅狗公。今日我要同廣大男士講,唔好再去扮演暖男,當你夠真,夠男人,其實比起暖男更令人尊敬。
 
唔少女仔會覺得,你只對我好,係一種愛,我認為係膚淺的,因為你而做一件事,可以話係愛,但如果佢唔愛你,就唔會再對你好,而愛唔愛,好虛,有日佢愛第二個,你就可以拜拜;一個有大局觀嘅女仔,佢知道你心地好,對邊個都有義氣,有承擔,咁呢個真男人,就好有安全感喇!
 
正所謂,仗義每多奢狗輩,義字,比暖難太多了,與其成為一個暖男,不如做返個真男人,一個連其他男人都會讚好嘅真男人。
 
蔣薇
www.fb.com/maydreaming

Read More
2018年06月09日

《識人定識字?》

54e3409290aa8d8a6247ae04b84591c4800d42ff_b
 
網上資料圖片
 
識人好過識字,呢句老生常談嘅嘢有邊個未聽過?
 
我知,世界上無讀過書而成功嘅人大把,我亦好同意,識人比識字有用得多,之不過,我想問個有雞定有蛋先嘅問題,你點去識人呢?
 
如果你係一個隱青,喺屋企上網打機打J,請問你憑咩去識人?好,唔講到咁極端,你係一個朝九晚六嘅打工仔,你又憑咩去識人呢?
 
你想識一班帶到利益比你嘅人,同時班人都會諗,你可以帶到咩比佢哋,咁你就要好清楚你係一個點嘅人,當你企係誠哥面前,俾三十分鐘你去同佢講嘢,你可以點令佢睇得上你?肯同你合作、肯同你深交?
 
而你會面對一個現實問題,你有幾多料?亦可以歸納成,識字範疇喇。
 
識字,唔代表係學歷、知識,而係泛指你有幾多料,你可以小學三年級畢業,但你可以喺某個領域有心得或者有經驗,當你可以提供到一堆人哋無而你有嘅知識或技能時,你就有你嘅價值。
 
社會上面講嘅,唔再係你係邊畢業,學乜專業,咩成績畢業,講真,學校學嘅嘢係幾咁皮毛相信大家都知,你讀到書,只不過代表你識讀書;社會講嘅,係執行力、係想法、係預算、係反應、係處事,望望你自己,有邊一項你可以說服到人,可以令人驚訝?
 
你要知道,識人,廢人都係人,如果你想識叻人,咁佢對你要求亦會比正常人高,需要知道要令勁人驚訝係好難。
 
如果你覺得乜都唔識,最緊要識人的話,咁只能祝你好運,或者有人有個email會送上門話你知有份遺產等你去拎,或者有日你發現你老母係誠哥秘密情人啦。
 
世界上無懷才不遇,更多情況係你有機會喺面前不過無能力去捉住,好似好多人講,如果樓市跌就可以買到樓,但亦有好多人係即使跌都無錢買,講永遠都係易,準備先係難。
 
望望你身邊嘅朋友,你喺其中算係點,而呢班朋友喺社會入面又係咩層次,你就會大約知道自己身處咩位置。
 
今日起,唔好再講咩識人好過識字喇,現實少少,先問自己值唔值得被結交先啦。
 
蔣薇
www.fb.com/maydreaming

Read More
2018年06月02日

《成功需父幹》

download-2
 
網上資料圖片
 
最近網上有篇文,有人呻話自己父母比錢佢去澳洲讀書,唔將筆錢去做首期買樓,係目光短淺,搞到佢依家要捱世界,睇到真係把幾火,而社會上愈來愈多人吹成功需父幹,有父母買樓、打本做生意、世叔伯人脈可以令自己衣食無憂,不如話點解自己唔係李嘉誠個仔?
 
每個人都有條起跑線,喺邊度跑,係整定,但跑嘅人係你自己,你可以跑得快、跑得慢、甚至唔跑,無人知終點係邊,但只要你肯行,一定可以前進。
 
作為一個成年人,你已經需要為自己負責,怨父母?比你講到啱又點?錯唔係你身上又點?無人會可憐你,最後只係你贏咗場咀炮,生活依舊係慘。
 
比個真實對話你哋聽,有個朋友佢講開自己生活好差……
 
「呢間公司真係唔得,班同事好仆街又搞小圈子,上司又無用又廢,老闆又出唔起錢,人工加得少少。」「咁你咪轉工囉!」
 
「我都想,但問題係個市好差呢,轉工又唔知轉邊行,出去又要重新來過。」「咁你有冇試搵工先?有冇見過工?」
 
「好多時張cv都唔夠人爭,邊有機會啊?」「咁你有冇諗過進修吓?」
 
「唉,最衰都係我老豆老母,以前個個同學都有錢去補習,又有屋企人照,讀唔成書都可以去外國讀個濕鳩Degree,我呢?乜都無!」「以我所知你會考得幾分喎,你覺得真係因為無補習嘅問題?」
 
同呢種人傾,佢哋仲有千萬個理由,每個人都可以俾佢數出幾項罪狀,就連當年個英文老師廢都可以係成就佢呢種生活嘅原因之一。
 
但佢從來都無提過,自己有乜問題,佢自己係少少錯都無。
 
當你係一個咁出眾嘅人,但全世界都要害你,想你死,咁我只可以話你係現代版項羽囉。
 
作為一個成年人,仲不停怨,不停屌,只會屌走晒你身邊嘅人,淨返一班同你一齊怨同屌嘅廢物,大家圍爐取暖,同病相憐,有時見到呢班人都幾好笑,點解可以集中到一大班懷才不遇嘅人?三個臭皮匠都可以有所作為,你哋咁出眾,仲坐埋一枱,宇宙大爆炸都進行到啦!
 
幾十歲人,仲講緊起跑線?我會建議斬掉重練啦!
 
呢個年紀,要跑嘅點都跑到,你賴無跑鞋、地硬、天氣差,呢世你都唔會跑到。
 
蔣薇
www.fb.com/maydreaming

Read More
2018年05月25日

《男人的黃昏之戀》

78b2dc11a07d0266f026248851ef6ede
 
網上資料圖片
 
早幾日搭車,一對五十幾歲嘅男女喺度攬攬,然後仲錫咀,旁邊有一班唔知大學生定中學生,佢哋無講乜,但從眼神睇得出,佢哋有點驚訝,有點錯愕,有點奇怪。
 
之前有張又係中年男女嘅地鐵打車輪相係網上火熱,大家會覺得,嘩你幾十歲人仲係街咁?但如果由一對十幾歲嘅情侶做就自然不過,但我睇,唔覺得驚奇,反而覺得係呢個年紀仲可以搵到第二春,可以打得火熱,係一種幸福,係一種浪漫,係一種恩賜。
 
三十歲打後,結婚嘅結婚,我哋唔再對網上低年齡層嘅愛戀、苦戀感到共嗚,唔會再糾纏喺今晚食乜啊bb呢種層次,又或者男女之間大不同嘅對峙,反而步入生活,面對生活壓力,養妻活兒等等問題。
 
幾多對持續愛到幾多歲?你幻想一下到你六十歲,身邊嘅老伴,仲會唔會有愛戀感覺?絕大部份人都已經係愛情變感情,再變親情。
 
好似我哋父親節母親節咁,父母影相都係肩並肩,會唔會攬同錫?唔會囉。
 
中年到老年人好似唔需要愛戀咁,只需要扮演好一個父親母親角色,又或者一個中年阿叔阿嬸就可以。但係,人可以唔做愛,唔可以無愛,點解咁多男人出去偷食?可能只想重拾一種虛無的愛戀感覺,明知係假,都好過無。
 
日本有本漫畫叫《黃昏流星群》,講中老年男女嘅愛,去到六十歲,你仲遇到一個令你心動嘅人,你會點?裡面有好多故事,有外遇,有喪偶,有不倫,有平淡,好多都不為社會所接受,或者講係主流,但描述嘅情意,就好現實同好唏噓。
 
到你六十歲時,對枕邊人全無愛意,而你唔知仲有冇十年命,你仲會唔會放棄你家庭妻兒去尋找愛戀?唔係人人有呢種勇氣。
 
好多人覺得,男人係下體為主導,女人係情感為主導,但我覺得相反,男人對愛都十分有要求,一個你愛嘅女人,令你感到愛意嘅女人係好重要,只不過男人同時性方面都好有渴求,所以發洩時可以得到一刻溫存,但完事後,再次打回原形。好似無間地獄咁,不停輪迴,因為連男人自己都唔知道,原來自己對「愛」,係幾咁有需要。
 
人一世流流長,如果下半世三十年無愛,你咪同行屍走肉無分別?
 
所以當你見到街上有上年紀嘅人有住年輕情侶行為時,記得一點,你都會老,將來嘅你,想係點,會係點?
 
蔣薇
www.fb.com/maydreaming

Read More