2017/04/28

《新,不如舊》

2017_04_28_蔣薇MenClub Column_photo
 
網上資料圖片
 
有兄弟結婚,唔知點解講起處女,有條口臭仔問:「喂,你老婆係唔係處啊?」
 
外人會諗,關你春事咩?不過熟到一個點嘅朋友聽到,就會反問:「在場有邊個女朋友或者老婆係處女?」大家都沉默相視而笑。
 
處女情意結已經講過,今日唔講處女,講二手。
 
以前好介意樣嘢跟唔跟上潮流,要新要快,但唔知幾時開始,我哋開始無再追新追快。
 
可能你發現潮流根本追唔切,又或者你覺得所謂潮流唔算一回事,但我歸納完之後得出結論係──我哋開始識欣賞舊。
 
男人經歷完幾十寒暑,你會發現新嘢總會變舊,曾經最新嘅遊戲機電話電腦相機,有日執屋時你會見到佢嘅遺體,一件兩件三件放喺你面前,掉又可惜,賣又無價值。好多時你會發現買完嘅嘢用兩用就放埋一邊,追潮流好多時你都未諗清楚,只係人有我有,人買我買,買返嚟先發覺同想像中出入好大。
 
今日出新遊戲機,就算有錢都好,你都會諗多兩諗,捱貴價炒價你唔志在,但你會覺得唔需要咁快買,過兩個月再買都未遲,呢兩個月時間你會諗清楚自己係想要定係追潮流。兩個月後,你喺市場會見到一大堆二手貨散出,可以用低於正常三成到一半去買手頭好。
 
成年人開始有自己嘅節奏,有自己嘅思考,唔會人云亦云,而我哋呢種慢少少嘅節奏,更舒服,更自在。
 
新定舊,快定慢,都唔及對定錯來得重要。
 
有樣嘢,叫經典,好似車、錶、相機都有經典款,佢可能係十幾廿年前嘅型號,但歲月無將佢哋淘汰,反而造就出一個久而不衰嘅傳奇。
 
凡事都會變老、變舊,但有部份會好似紅酒咁,愈舊愈有味道,但亦有部份新一排就會丟棄,兩者分別,叫內涵。
 
當你識得欣賞舊嘢,唔再隨波逐流之時,你就會成為一個真男人。
 
蔣薇
www.fb.com/maydreaming
 

COMMENT