2017/05/05

《楊千嬅與楊冪》

2017_05_05_蔣薇MenCLub Column photo
 
網上資料圖片
 
有睇《春嬌與志明》嘅朋友,通常都會大叫,有乜理由揀嬅嬸都唔揀楊冪?仲話一百個男人九十九個都會揀楊冪,分明搵戲嚟做。
 
今次我就用個一百零一個會揀楊千嬅嘅身份同大家講講呢個話題。
 
講樣、講身材、講年紀,嬅嬸都輸一大截,如果要揀一個同你過一晚,咁用以上理由去評論當然無問題,但如果揀個人過人世,我覺得揀嬅嬸唔出奇。
 
每晚熄燈,我當你當打一次半個鐘,每晚三次都好,咪又係個半鐘,咁其餘二十二又半個鐘,你係要揀個人相處,而唔係揀個樣靚身材正嘅人俾你望。
 
兩個人相處,會閒談會甜蜜會鬧交,你係志明的話,你平時喜歡做低能嘢玩乾冰,會去七仔食意粉,伴侶會唔會認同仲有投入你嘅生活,就係講夾唔夾,試諗吓你每日生活有好多嘢對方都唔投入唔配合,甚至唔明你做乜,嘗試去改變你去迎合佢,你,仲係唔係你?
 
有冇試過同一個人拍拖,你做嘅嘢對方唔欣賞,仲會叫你唔好做,現實唔少呢種例子,有人將珍藏嘅漫畫、模型、遊戲機都清倉,就係因為對方「覺得」唔喜歡,而你做好多決定,有時想認吓叻,鳩嗡一下時,對方又唔俾反應,仲一臉認真地鄙視你,我諗你都會幾無癮。
 
拍過幾次拖之後,你會發現,只要你有事業有錢,學鷲哥話齋,隨時你都搵到靚過楊冪嘅臭雞。
 
搵個靚嘅唔難,但搵個夾嘅就好難。
 
夾唔夾,有錢買唔到,陪你吃喝玩樂上床旅行嘅女人好多,但你搵唔搵到一個會喺你講爛Gag時俾反應,等你落到台之餘仲可以串返佢兩句?當你講起童年回憶時佢可以同你講,我細個都係咁;當你生日時,會買一件你想要好耐嘅玩具而唔係求其買隻名錶俾你。
 
同一個人過一晚好簡單,但同一個人過一世就好難。
 
局外人睇志明好唔理性,就好似外人睇自己感情一樣,佢哋睇嘅好表明,感情之中唔係一段二段一百二十分鐘嘅電影咁簡單,而係每分鐘喺生活度刻劃出記憶,呢種記憶,Behind The Screen,只有你知,佢知。
 
如果你將一生決定放喺眼球同陽具之上,祝你好運。
 
蔣薇
www.fb.com/maydreaming
 

COMMENT