2017/05/12

《改變男人的三種女人》

2017_05_13_MenClub 蔣薇
 
網上資料圖片
 
男人點解會成長,點解會改變?不外乎傷痛或者女人,又可以係女人帶俾你嘅傷痛啦。一世男人,我覺得有三種女人改變男人最多……
 
第一個,你阿媽,正所謂阿媽都係女人,影響你前半生嘅女人最多肯定係你阿媽。阿媽係你人生中第一個女性,即使你係毒撚,無伴終老都好,你都會有阿媽生。未懂事之前,你都係由阿媽照顧,活喺佢嘅魔掌,啊唔係,係母愛先真,你食乜、玩乜、睇乜都係由佢掌控,你第一次知道女人嘅控制慾係點。
 
面對阿媽,你只能服從,唔係就只有皮肉之痛承受,你唔可以嘗試同佢理論,因為佢就係真理,而作為一個細路仔,你又點講得贏你阿媽呢?你講多兩句就係駁嘴,就係要打!你無得唔去改變自己,慢慢發展成為你阿媽心目中嘅乖仔。
 
第二個,女朋友,如果你係A0,可以出返去先,但如果你拍過拖,試諗吓你拍前拍後有乜唔同,你就會感到好唏噓。
 
你不知不覺習慣每晚傾電話,無嘢都要搵嘢講;你打少咗好多機,因為你打機會俾人鬧唔理佢;你出完街要送人返屋企,原本半個鐘嘅歸程變咗兩個鐘;以前出街食就食阿媽,家陣出街食就俾人食。
 
當你覺得唔妥,認為唔應該咁,你去同佢爭辯時,通常都係以發脾氣收場,唔似阿媽,你唔會受皮肉之苦,但我更相信你寧願受皮肉之苦都唔想半夜三更去氹女朋友,又或者成晚無得瞓去道歉,仲要說服自己,你真係錯,呢樣先最難。
 
第三個,你老婆,如果你好彩的話,搵到個可以過人世嘅老婆,你就會面對最大改變,你唔再需要講電話,因為你已經同佢住埋;你唔需要再打機,因為你屋企根本唔會存在遊戲機,取而代之係家務;出完街唔需要送返屋企,但你頭痕個屋企究竟點嚟;出街亦唔需要俾錢食飯,因為你份糧已經掌握喺老婆手上。
 
可怕嘅係,你已經唔會再反抗,除非你想離婚,而咁大個人亦睇化咗,恭喜你,你嘅改造完成了,再諗返未接觸女人之前嘅你係點?
 
講返正經,呢三種女人,其實代表三種改變,阿媽想你改變自己令自己變得更好,女朋友想你改變令佢變得更好,老婆想你改變去令大家變得更好。
 
變,未必係差,只係睇你遇著一個點嘅女人,點解成功男人背後總有一個好女人,因為一個好女人係可以令男人變得成功。
 
蔣薇
www.fb.com/maydreaming
 

COMMENT