2017/05/19

《改變男人的仆街》

2017_05_19_MayDreaming Menclub
 
網上資料圖片
 
上回講到男人一生中受女人影響好多,即時俾兄弟們聲討投訴,用返原句:「你敢話我哋呢班仆街無影響你。」
 
既然你都知你係仆街啦,咁我都一如你哋所願寫吓你班仆街啦!
 
兄弟同女朋友有乜分別?你唔理一個兄弟十年都仲可以係兄弟,你唔理一個女朋友十個鐘,佢已經唔再係你女朋友。當你換咗十個八個女朋友,兄弟都可以始終如一。
 
男人一生中總有幾個兄弟影響得你好深,中小學用咩書包文具,玩咩運動打咩機,通常都係圍威喂一齊玩;再之後選科選大學都離唔開一齊共同進退。
 
除咗伴你長大嘅兄弟之外,仲有種男人令你改變,就係假想敵。
 
每個男主角都有宿敵,現實中你身邊會有班特別優秀,受歡迎嘅男仔,你無形之中會將佢定為目標,暗中較量。
 
女人改變男人,男人只係被動;男人改變男人,男人通常係主動。
 
當你追趕完目標之後,你不知不覺改變,通常都係變得更好更強。仲記得當年有個次次都考第一嘅男仔,仲要好受女同學歡迎,於是有次我暗暗中喺某一科測驗出一百二十分力,最後真係贏咗,而呢件事亦無乜張揚過,只係在心中。
 
人生中總會遇到困難同逆境,想搵人傾訴?你要諗吓要個聆聽者,定係解決者,如果你想個心舒服,同女朋友傾絕對夠;但如果你想真正解決問題或者令你更接近解決,必定係兄弟先做到。
 
無數夜晚,一個急call,大家聚首,喺酒精幫助下,問題一一釋懷,過完一關你又再次成長,而呢段經歷將會成為下次茶餘飯後吧話題,十年八年後都可以再次回憶。
 
電話簿入面,有幾個號碼你可以同佢盡訴心聲,你都知對面嘅人會聽完成個故事,或者安慰你或者屌鳩你或者幫助你。
 
成功男人背後可以無女人,但成長背後,你一點一滴不能少咗呢班兄弟。
 
蔣薇
www.fb.com/maydreaming
 

COMMENT