2017/06/22

《十級野球拳的浪漫》

2017_06_22_野球拳
 
網上資料圖片
 
平均一級野球拳要打6x次先升一級,十級保守估計要打六百幾下,以你一分鐘可以打到五拳去計,練爆佢,應該要兩個鐘,對於玩金庸群俠傳嘅朋友嚟講,十級野球拳係執念,每爆一次機,意味住你要花兩個鐘去空揮野球拳……
 
今日你走上街同一個學生講野球拳傳說,佢哋只會嗤之以鼻,點解要花時間去重覆練?自動掛機咪得,課金咪得,擦寶物咪得,我無說服佢,只係心入面問返自己,咩係野球拳?
 
幾乎每一日都有新Game出,每隻Game都有招式,華麗、霸氣、無敵芸芸眾技之中,你作得幾大都得,但從來無一招可以傳奇如野球拳,金庸筆下降龍十八掌又好,獨孤九劍都好,都可以稱得上係絕世武功,點解野球拳會壓住佢哋?講攻擊力,只係比降龍十八掌高少少,比範圍又差過九陽同九劍,問題在於一個,練字。
 
練,有乜嘢唔駛練,但野球拳就係練得特別辛苦,一定要靠你打一次升一次經驗值,同一個時間,你已經練晒九種絕世武功。
 
練,雖然辛苦,但亦係遊玩過程,好似砌模型咁,你大可以拎多幾百去買一個完成品,不過有意思咩?係,買返嚟嘅係完美同快同輕鬆,比起自己砌錯嘅成品,睇結果的話好明顯買係好,之但係,男人有時就係追求一樣自己郁手嘅滿足咁,愈大嘅辛勞,愈強嘅滿足,愈印象深刻。
 
武功嚟講,野球拳係主角嘅初始技,人人都有,唔需要條件,唔需要資質,唔需要課金,需要嘅只係時間。
 
現實唔會出現野球拳,因為佢一視同仁,只需要你付出努力就一定見到成果,比起今日+ 999道具同武功,佢無幸運成份,亦唔同你講金,作為武者,歸根究底,花時間去練功,先係武道。
 
一級野球拳,打得人十血八血,係垃圾般的存在,今日遊戲入面,肯定列入垃圾技能,賣商店或用嚟升其他技。因為今日嘅遊戲好簡單,勁,就係勁;廢,就係廢。無論你花幾多時間去練廢技,都唔會贏到勁技,即使佢無付出過,平衡性遊戲性我就唔講喇……但野球拳就係一種信念,垃圾都有飛天一刻,只要你努力,你都可以屌打神功,用最純粹,最戇鳩嘅方式,成就最強之名。
 
野球拳之所以經典,原來唔係佢勁,而係佢背後嘅信念。
 
一種堅持、一種努力、一種過程、一種體驗、一種平等、一種反勝嘅浪漫。
 
今日嘅遊戲,唔會再有野球拳,因為佢唔需要你堅持同努力,亦唔講過程同體驗,更無平等同反勝,所以今日嘅遊戲,你會玩,但十年二十年後,你唔會再記得呢款遊戲,因為佢裡面,無靈魂。
 
蔣薇
www.fb.com/maydreaming
 

COMMENT