2017/06/30

《從Jordan到Curry》

may 20170630
 
網上資料圖片
 
男人好念舊,就好似戀愛一樣,初戀永遠係最深刻,如果你問我,籃球之中,邊個係我初戀,我會答你係MJ,但今日喺你身邊嘅,已經唔再係MJ,而係Curry。
 
從你衣櫃嘅球衣,已經可以估到你年紀,如果你有MJ,應該係70/80後,Iverson/Kobe,應該係80/90後,Lebron James/Curry,怕且係90/00後了。
 
同朋友食飯講開,佢有個理論:「如果喺街場你見到有兩個人,一個著Irving,一個著Curry,你覺得邊個勁啲?通常都係rving,因為著得Irving嘅通常都扭得吓,而著Curry,三分準極有限。」
 
笑話聽吓就算,唔好認真,但著一件籃球衫的確反映你係咩人,喜歡咩打法,每個時代都有籃球之神,仲記得當年MJ當打時,總有班粉腸不自量力地想喺罰球線入樽,亦有班人射波時硬係要伸吓脷;後來Iverson紅嗰陣,人人都要擦花要Crossover,矮仔當年真係十個有八個係佢Fans;然後Kobe上場,好多飛Away出現,明明企定定射都得,佢都係硬要飛,得閒又咬吓衫咁;Lebron James……唔係人人係坦克車,咁多個入面最難學就係佢;當然唔少得Curry,呢幾年班人射三分已經射到上癮。
 
當你年齡有返咁上下,縱使有個幾強勁嘅新秀出現,你都只會覺得佢勁,而唔會崇拜佢,點解?因為你已經唔再係無知少年,嗰段模仿球星嘅歲月經已過去,你唔會再抬頭去望住佢,而係會用抽離嘅目光去睇。
 
波照睇,但你硬係覺得差咁少少嘢,你已經唔再係背得出所有隊所有球員嘅人,好多陌生樣子,就好似你去唱K咁,新歌十首有八首唔識,寧願唱返舊歌一樣。
 
望住勇士一球一球三分,你心中有點不是味兒,老餅的你更想睇返當年話入你就入你嘅MJ,一個扭十個嘅Iverson,單天保至尊嘅Kobe。
 
所以話,男人好念舊,唔係因為佢專一,而係因為童年回憶永遠係最美好。
 
蔣薇
www.fb.com/maydreaming
 

COMMENT