2017/07/07

《男人就應該對自己狠一點》

2017_07_07_蔣薇MenClub Column
 
網上資料圖片
 
有冇聽過柒牌男裝,佢有句口號叫「男人就應該對自己狠一點」,我覺得係一個完美Marketing,敢將一件叫「柒牌」嘅衫著上身,你對自己真係又狠又絕。
 
講返正經,呢句嘢都真係有少少深度,我都認為做男人應該對自己狠一點。
 
點解狠?呢排天氣熱到一個點,你出街都唔多想出,同朋友傾開做運動,我話呢排都係Prefer游水喇,唔跑步,佢就話:「做人有時要對自己狠,游水係舒服,但係咁嘅天氣底下跑步,你得到嘅遠比游水多。」我心諗,乜唔係游水燃燒卡路里多過跑步咩?咁嘅天氣游水起碼唔會成身汗先啦。
 
佢跟住講:「我都好唔鐘意跑步,樓下我有游池,但跑步跑到成身汗,熱到爆炸,唔單止係減肥,仲可以磨練你意志!」
 
人好多時都會進入一個Comfort Zone,特別係年紀開始大,事業上軌道,上咗岸,唔多駛捱,準確講係,你開始可以避免捱,獲得舒適之時,亦緩慢進步。
 
男人點解會進步?通常都係做唔喜歡,做辛苦嘅嘢,當年讀書俾老師迫,跟住拍拖俾女朋友迫,然後返工俾老闆迫,迫迫吓漸漸迫你向前,但去到某個時間就無人迫你,你就會選擇一條舒服嘅路。
 
你會話,做人唔係求舒服求開心,你奴性都幾重喎!
 
我同你講,唔關奴性事,只係你對自己有要求,每每都要令自己突破,突破點就係堅持做一啲你覺得辛苦但應該做嘅事。
 
人有惰性,望吓你身邊朋友,係唔係好多都發福,因為對自己太好;係唔係好多人都埋頭喺生活同消費之中,因為對自己太好;係唔係好多人唔再進步,你問佢最近搞緊乜,佢會答你都係咁,因為對自己太好。
 
對自己太好,造成一連串後遺症,令你停滯不前,令你失去方向,你可以選擇,但你無做到一個好選擇。
 
成日聽人講,我認真起上嚟連自己都驚,但有幾可你會認真到?只不過係一種自我催眠,話俾自己聽自己仲掂,但自己就愈嚟愈唔認真,做乜都俾藉口自己。
 
男士們,望吓身邊人,對自己愈狠嘅通常都愈有成就,愈有魅力。
 
回想吓,係唔係有好多你想做,但諗一諗又覺得好辛苦好攰唔知得唔得嘅事,不妨對自己狠少少,的起心肝去做,唔好諗,唔駛解釋,更唔需要藉口,Just Do It!
 
蔣薇
www.fb.com/maydreaming
 

COMMENT