2017/07/14

《男人應該享受單身的快樂》

19-1
 
網上資料圖片
 
朋友失戀,約出嚟打波,兄弟當然一呼百應啦,失戀喎,大家仲唔出嚟笑吓,呃,應該係安慰吓兄弟。成六年感情,仲一齊買埋樓,最後樓升咗賺咗,但要分錢,女方仲提出裝修係佢搞,仲有Keep單,所以要分多一份,錢有,但成件事好涼薄,好令人惋惜。
 
三十歲人左右,今時今日先分手,身邊朋友又大部份有著落,結埋婚,甚至生咗兩件,球場上中場休息,見到悶悶不樂嘅朋友,大家都用盡力去「安慰」佢。
 
「我覺得我仲係未放低呢段感情……」失戀的人最常講就係呢句。
 
我忍唔住同佢講:「分手就係分手,無得翻兜,大家心裡面都有條刺,倒不如早少少放棄啦!」
 
「但我都係唔習慣呢種單身嘅生活……」
 
唔講由自可,一講大家都有超大反應。
 
拍緊拖嘅兄弟:「你知唔知我要出嚟打波食飯都要問准對方啊?仲要好似欠咗佢咁,出嚟打個波要有歉意,要道歉,要補償,你知唔知我幾羨慕你去邊都唔需要交代呢種生活啊!」
 
結完婚嘅兄弟:「今晚我返到屋企,仲要對住老婆,瞓之前仲要洗衫晾衫拖地,以前一個人做一份嘢,依家要做埋老婆嗰份,你單身只需要對自己負責,你唔好話我唔恨喇!」
 
生埋仔嘅兄弟:「今時今日我出街都要諗個女,遲咗返屋企老婆又會嘈,話我唔顧家,就算我哋想去個旅行過二人世界都唔得,我已經好耐無買過衫俾自己喇,但幾乎每個星期都要買衫俾個女,今日你可以自己錢洗喺自己身上,係一種福氣!」
 
「你諗吓,今日你單身,你想去邊就去邊,想溝邊個就溝邊個,一個溝十個都無問題,反觀我哋?做每件事都要諗後果,有負擔,你知唔知你依家係幾幸福?你就好似一個充滿財富嘅人喺我哋呢班窮人面前呻窮啊!」
 
「但係……你睇我好,我睇你好……」
 
「無錯,你睇我好,我睇你好,所以今日嘅你應該好好珍惜你擁有嘅好,點解你唔去運用你現有自由,反而要去睇我哋有乜好?失戀,就應該享受單身,唔好再執著喺放唔低上面,你都唔係第一次拍拖啦,時間總會過去喎,到有日你好似我哋咁做咗九叔,你就後悔自己無享受單身喇!」
 
你一句我一句,大家都對呢位失戀人士發炮,去到某一個年紀,你已經要定落嚟,單身歲月所餘無多,跟住落去下半世,你可能都要對住某一個女人,每個行動都有代價。
 
偶爾諗起當年成班中學雞,兄弟行先,想打機打機,想打波打波,想溝女溝女,一切俱往矣。
 
我知實有女人會講,咁想單身你咪分手離婚囉,嘿,問得即係你份人無乜邏輯,單身有單身好,結婚有結婚好,你結完婚望單身係錯,你單身望拍拖都係錯,講到咁白,明唔明啊?
 
蔣薇
www.fb.com/maydreaming
 

COMMENT