2017/07/21

《養起老婆係夢想》

2017_07_01_may dream menclub
網上資料圖片
 
講起夢想你會諗起乜?通常都係幾偉大!但我有個朋友嘅夢想係我第一次聽,養起老婆!
 
養老婆,我哋唔好評論乜男女平等之類嘅嘢,但係我細細個時,我從來都唔覺得養埋老婆係一個問題,目睹自己老豆當年一個人養起成頭家,阿媽係全職主婦,有一種理所當然喺心中。但人大咗,社會都變咗,今日公一份婆一份先係常態,有幾多人敢講一句:我養你?甚至去到一個「夢想」Level。
 
古語有云,唯女人與小人難養也,斷章取義放喺今日,都真係幾應景。養一個女人,平有平養,貴有貴養,但一個有幾分姿色,情性又唔差嘅女人,你估可以平養得去邊?
 
今日香港,大家識得結得婚嘅都唔會差太遠,通常你搵幾多,佢唔會少你太多,仲有唔少女人高過男人嘅例子,假設你搵三萬一個月,你老婆搵二萬,要養起佢,又保持返平時生活,你最少都要有四萬幾先夠用,但細數香港搵到呢個數嘅,又有幾多?
 
你可以話,其實三萬都好好洗,咁咪節衣縮食去少幾次旅行囉,問題就嚟,你平時嘆慣食慣玩慣,點解可以突然放棄呢種生活走去捱,你肯捱,你老婆都係買個包包啦,佢心諗,你買唔到,咁我咪做嘢買囉。
 
就算生埋仔都好,大家都係脫離唔到呢個工作地獄,職業女性寧願返工搵錢,寧願每個月俾幾千請個外傭都唔肯做主婦。
 
討論區最近有個Post講日本妹,講日本妹通常都係全職主婦,老公每個月只有二萬五千日元做零用,將萬千港男嘅幻想一舉破滅,留意返,個討論係話:「我每個月俾二萬五千日元老公做零用係唔係太多啊?」老細,係太多啊,太多啊!!??用香港語言去睇,你上網見到有個阿媽話每個月俾2000蚊港紙個仔做零用,大家都覺得差唔多喇,更何況一個成年人?講白少少,我哋去日本旅行,一日都用成二萬五千日元啦!
 
家家有本難唸的經,原來養老婆都係一個國際問題,唔單單係發生喺自己身上。
 
有時候夜闌人靜,我都會幻想有日可以養起老婆,等佢無咁辛苦,但望望自己銀包,唯有叫自己努力。
 
新聞成日都見大字標題:「XXX放棄高薪厚職,追尋夢想。」我心諗,追夢係一時,養老婆係一世,敢講一句「我養你」,其實比起唔少夢想,更有勇氣,因為追夢係一時,養老婆係一世。
 
所以我好佩服養得起老婆令佢哋可以做全職主婦嘅朋友,簡直係能人所不能。
 
如果當年香港人勤力嘅係獅子山精神,今日肯養老婆加兩個仔女,係登緊珠峰啊!
 
蔣薇
www.fb.com/maydreaming
 

COMMENT