2017/07/28

《爸爸,爸爸》

2017_07_28
 
網上資料圖片
 
「祝你父親節快樂啊!」以前係一句最難聽嘅咀咒,廿零歲做爸爸真係唔知點算好,但幾年之後,身邊朋友一個二個都生兒育女,做爸爸,已經唔再係咀咒,而係祝福。
 
仲記得朋友好耐之前有一次無做安全措施,女朋友遲咗,佢嚇到面都青埋,我哋一個二個笑住大叫「爸爸,爸爸,唔好唔要我啊!」今日佢生咗第二件,個Facebook唔再係放高達同旅行相,而係一個個仔女相集。
 
男人係一種唔喜歡長大嘅動物,明知前面會發生咩事,佢哋都唔接受,就好似小學時永遠會話唔會同女仔玩咁,中學會話自己想同呢個女仔一生一世,大學又會話自己將來唔會打死份牛工,畢業之後就話唔想結婚,打算結婚又話唔會生仔。
 
但你望住身邊人一個個出Pool,失戀,工作,結婚,生仔,慢慢朝住最標準嘅人生前進時,你又敢話自己與眾不同嗎?
 
人人都扮過浪子,講過「我係一隻無腳嘅雀仔」呢句台詞;今日,雀仔死咗,轉生咗做一隻牛,不再飛天,不再飛翔,得到一句「你做人腳踏實地咗喎!」嘅讚美,又或者係慨嘆。
 
年輕時好難想像到自己係一個爸爸,因為未長大,我哋仲停留緊係一個好幼稚嘅階段,不知不覺間,幼稚沉澱、發酵,釀成了成熟。
 
我哋唔再口出狂言,
我哋唔再嬉皮笑臉,
我哋唔再緊張武斷,
我哋唔再天真簡單。
 
身邊朋友做咗人老豆,個仔一路一路長大,你大人一輩,當你朋友叫佢個仔叫你「叔叔」時,你想唔認老都唔得,就算你點糾正佢叫「哥哥」,你喺佢心目中都係叔叔,甚至阿叔。
 
三十歲,係一個分水嶺,結婚生仔,你唔做,就可能無機會做。
 
約朋友出街,唔再係工作忙、女朋友唔俾,而係要湊仔。
 
你會開始心慌,你會開始寂寞,因為大家都忙於自己生活時,你好似無乜細藝,你會諗,當你五十歲之時,朋友們同你生活愈行愈遠,佢有自己家庭,而你仲係一個人,點算?
 
或者大家都曾經覺得自己係最特別嘅一個,就好似故事入面嘅主角一樣,但主角有幾多?你又有冇主角咁有自我?絕大部份人都會走向最平凡最普通嘅路。
 
生唔生?有好多因素,有好多考慮,當你考慮得,即係你唔抗拒,只不過係時候未到。
 
三字頭,爸爸,兩個字,唔算好難聽,更難聽係,無人叫你爸爸之時,好多人叫你叔叔……
 
蔣薇
www.fb.com/maydreaming
 

COMMENT