2017/08/11

《同好兄弟去一次瘋癲之旅》

2017_08_11_May MenClub
 
成日話朋友唔駛多,好兄弟幾個就夠,不過要你問心,咁多個好兄弟入面,你要搵個最好最好嘅出嚟,就好似結婚邊個做伴郎咁,你一定會即刻知道係邊個。
 
人生有好多旅行係必須去,其中一個我覺得一定係同最好嘅兄弟去癲番次。
 
旅行成日去,但拍拖之後首選都係同女朋友去,無它,女朋友就係有特權,凡事都優先,有時兄弟聚會都會講起幾時去旅行啊?大家夾吓個期,一個搖頭無假,一個話無錢,另一個又話要湊女,成行?難過登天,今時今日深夜夾到時間打舖機都已經還神。
 
如果要俾你揀一個人去旅行,同女朋友去一定會煩,成個旅程都係你照顧佢擔心佢,去嘅地點可能係韓國台灣泰國呢種好啱女仔去嘅地點,食嘢睇嘢又唔到你揀。
 
幻想一下,如果係同你最好嘅兄弟去,會係點?
 
首先,你會去到一個唔係淨係行街買嘢食嘢嘅地方,唔同女人,做得兄弟大家總係臭味相投,你喜歡嘅地方,你兄弟都唔慌會討厭得去邊。你可以去偏少少嘅國家,好似越南、印度、西藏、烏克蘭呢類地方,有少少危險,但兩個大男人怕咩?你亦唔需要去擔心旅伴安全。
 
自畢業之後,你都好少可以同朋友出相入對幾日,兩個男人話題可以話係數之不盡,由漫畫動畫,工作趣事,國家政局,人生意義你哋都可以暢談,兩個人摸住酒杯底,有返咁上下年紀,懷念過去,幻想將來,呢種話題係你同女朋友去體會唔到的。
 
兩個男人出國有乜好做,少不免係夜生活,落Bar落Club可以話係必去,瘋狂昅女兩把口無句好說話,如果你同你兄弟都係單身,咁大家可以約定今晚邊個返房瞓邊個出去瞓,咁你都總希望大家有著落嘛,但通常都係兩個醉到仆街地返酒店一齊瞓……
 
同兄弟去旅行,係自在嘅,想傾計傾計,想打機仲有佢陪你打,食飯唔駛煩,昅女唔駛避,除咗深夜佢滿足唔到你某些需要之外,我諗一個好兄弟都算係最佳旅伴了。
 
咩話?你仲未試過同好兄弟去過旅行?咁將會成為你人生一大遺憾。
 
我想話,如果人生有一張免費機票俾你同任何一個人去旅行,而呢個決定唔會有任何代價嘅話,我二話不說就會俾呢位兄弟!但現實係有代價,我只可以同女朋友去,然後同兄弟講下個禮拜我去旅行喇……
 
而呢位兄弟一定會回我一句:玩得開心啲!
 
而我心入面一定會諗:總有一日一定要同你再去一次旅行。
 
我知,你覺得好基嘛,能成為密友大概總帶著愛,你懂的。
 
蔣薇
www.fb.com/maydreaming
 

COMMENT