2017/08/17

《帶住爸媽去旅行》

2017_08_17_蔣薇MenClub Column
 
網上資料圖片
 
上星期講話同個兄弟去旅行係人生一大樂事,另一個朋友睇完同我講,同自己父母去旅行都係人生必做嘅Check List之一,同佢傾完覺得好值得寫俾大家睇。
 
朋友雙親幾年前已經唔喺度,三十歲左右就一個人住,有件事佢好後悔無做嘅就係無同過自己爸媽去旅行,當年佢剛剛畢業又唔係搵好多,諗住時間流流長,今年唔去下年去,想搵假就難搵,寧願將假期花喺自己女朋友身上,一年去兩轉,將同雙親嘅Trip不斷延期……
 
直到一年突然走咗一個,過多年另一個都走埋,呢個Trip已經唔再存在,曾經諗過去遊輪旅行比較舒服,又或者跟團去泰國悠閒玩幾日,諗諗吓,變咗拜山先見到個靈位同張相。
 
每次諗起呢件事,朋友都覺得好自責,有一次佢哋差少少成行,睇好晒團,但朋友打算結婚所以要儲錢,佢阿媽話唔好浪費錢喇,我哋幾廿歲人去咁遠都唔知做乜,又唔識英文,你留返錢結婚好過啦。
 
一個猶豫,後悔都嚟唔切,到阿媽瞓喺醫院時,佢強顏歡笑話:「嗱,應承我快啲好返,之後一齊去旅行,等我帶你周圍玩,以後我養你,你唔好做嘢喇!」佢阿媽應承話好,但折磨咗半年,最後都係離開咗……
 
想同老豆去,但佢話阿媽剛剛走咗無心情,大家都明,但拖咗一年連老豆都走埋。
 
好多人會覺得同兩老去旅行好麻煩,訂機票唔可以太早太夜,又唔可以廉航,更唔可以住民宿Airbnb,行程又要輕鬆方便,食餐好少少阿媽又話貴,行吓街買嘢老豆又嫌悶,最後可能落得一場唔太高興嘅旅程。
 
新一代去過嘅地方已經多過雙親好多,你交代一聲去旅行,但父母就好少會去,可能唔捨得,又可能唔敢去。
 
曾經父母仲係壯年,帶住仲係好細嘅我哋四圍去,到今日我哋有毛有翼,父母再無能力周圍去,我哋有做過乜?
 
帶住父母去旅行,難,但肯定值,旅途可能係最後一次同佢哋相處傾計咁長時間嘅機會。
 
下次有錢,有假,不如掉低女友,帶住父母去一次親子旅行。
 
感受自己是孩子,
 
感受父母的囉嗦。
 
拍低旅行嘅一點一滴,就算係幾無聊嘅事,喺某個日子,都會升值,甚至無價。
 
蔣薇
www.fb.com/maydreaming
 

COMMENT