2017/08/25

《蒲機舖的那些日子》

2017_08_25_maydream menclub
 
網上資料圖片
 
機舖,慢慢成為時代的遺物,今時今日仲有幾多人會行入機舖?應該話,今時今日仲有幾多機舖俾我哋行入去?
 
當年銅鑼灣世貿、九龍灣德福、深水埗長江、沙田新城市、旺角Cyber,曾經都係我哋嘅回憶,聚會前打住機等,食完飯再去機舖打兩場,機舖代表住我哋嘅青春,代表住嗰啲仲會同同學朋友一齊流連忘返嘅日子。
 
今日留低嘅機舖,已經淪為老虎機場,入面一班行屍走肉㩒㩒㩒,佢哋眼中好似了無生氣,真係後生仔打嘅已經唔多,可見將來呢個惡性循環,只會令機舖愈來愈少,少收入,遊戲生產商都唔會再投放太多喺街機上面。
 
仲記得未夠18歲只可以入兒童場,喺西九龍中心頂樓奇趣天地入面,好似今日都仲存在,兒童場比起成人場更貴,因為要買代幣,一個代幣要兩蚊,兩蚊一盤對於一個星期只有二十蚊零用錢嘅我貴得離譜,所以當年入機舖係睇多過打……
 
兩蚊舖唔在講,佢仲會將個難度調到最高,對於一個小朋友講,入錢一分鐘,兩分鐘已經玩完……對於窮苦少年如我,睇已經好開心,因為睇都係一種樂趣,
 
後來轉戰成人場,打開咗一個全新世界,比起兒童場遊戲更新更多更平,只不過你要忍受濃煙同埋機台上面煙頭痕跡。
 
而成人世界比小朋友可怕得多,鬧交打交經常發生,仲曾經見過一個人因為KF一炒三而比人用機舖摺椅打到爆缸,自此之後成個場都換晒膠椅。
 
機舖係一個幾公平嘅地方,坐落去打嘅只有技術,你再多錢都無用,唔似得今日唔夠人打就用錢升級再屈返人轉頭,當年有技術嘅可以幾十連勝坐係度,再有廿幾人圍觀。
 
今日你唔會再約朋友去機舖,當你自己一個走入去時,你發現唔再熟悉最新遊戲,所以你揀咗部經典五百合一玩返一場陳年舊game;今日你已經唔同以前,一百幾十打機好隨便,不斷投幣之下,你打通咗一隻曾經未爆過嘅game,但你無得到滿足感,推開機舖大門,只有一陣失落,你唔知道自己幾時會再踏入機舖。
 
你只知道,那些蒲機舖嘅日子,已經過去,想捉,都捉唔到,想留,亦無意思。
 
蔣薇
www.fb.com/maydreaming
 

COMMENT