2017/09/01

《Game書的末日》

2017_09_01_MayDream
 
網上資料圖片
 
有日電話無電,諗住行過便利店買本Game書睇吓,點知搵嚟搵去都搵唔到以前睇開嘅GZONE,逢星期四出版,點知搵唔到,另一次星期四行過,都係無,一探之下先發現,原來已經喺五月停刊……
 
曾經睇過咁多本嘅Game書入面,覺得最好睇就係佢,比起一般書轉載新聞,寫堆講完等於無講嘅報導,佢哋有唔少深層討論,例如講成個無雙系列嘅演變,講三國小人物正史,講遊戲商嘅過去之類,呢種題目,唔係你copy and paste就可以,而係分析思考同舖排過先可以寫得出。
 
無奈,唯一一本我覺得仲係高質嘅Game書,都已經成為歷史……
 
或者你會諗,今時今日仲有邊個會睇Game書?有乜係上網搵唔到,巴哈,電玩巴士,甚至高登連登都有推到完場嘅討論貼,由新手須知,到完整攻略,心得分享,秘技隱藏內容等都清清楚楚,你無必要再喺星期四走落街買本書,再喺裡面搵資料,仲要諗地方保存呢本嘢。
 
想當年無上網,連上上下下左右左右BA都係口耳相傳,都市傳聞上太空捉夢夢,加上一堆日本文字卡關,無Game書你連點玩都唔識,好多仲主打金手指,十幾頁都係代碼,細個完全唔明點解會有呢種資料外洩,更唔明Game書編輯係邊搵到呢堆資料。
 
唔識日文,Game書可以幫你了解內容,等你更認識故事,即使你無玩,你都可以從攻略故事入面去感受一下遊戲,每星期買本書,係需要,亦係一種習慣。
 
唔記得幾時開始無再買書,十五二十蚊唔係出唔起,只不過隨住人愈大,愈少打機,好多時都係得個睇字,由家庭機,到手提機,再到手機遊戲,我哋玩嘅習慣改變咗,最近網上有人感慨,買隻Game返屋企,兩日都未打開過,係,我哋入息高咗,想買隻Game輕而易舉,但好多時買都係一個執著,一個感覺滿足,買咗好似玩咗咁……
 
今日嘅遊戲已經有唔少中文版,你唔再存在唔明佢講乜,更重要係,好多故事都係一隻直線,幾乎係弱智都可以玩得贏,玩遊戲唔再係挑戰你能力,你技術,而係挑戰你「時間」,你擁有足夠時間,基本上就會自動通關。
 
就好似最近唔少手遊咁,竟然標榜自動掛機,返工你都升緊級,瞓覺你都升緊級,我諗一隻猩猩都可以從亂禁入面爆機。
 
腦殘玩法,你作為一個game書編輯,要去為呢隻Game去寫篇文,就好似《破壞之王》入面,你不如拎本《倚天屠龍記》或者《金瓶梅》代入隻Game仲精彩啦。
 
想當年我都曾經幻想過做Game書編輯,仲諗住去讀日文,然後過住日日打機返工嘅生活,一切俱往矣。
 
今日已經唔需要攻略,需要嘅係長時間磨;
今日已經唔需要秘技,需要嘅係無限金錢;
今日已經唔需要技功,需要嘅係SSR UP。
 
今日已經唔需要Game書,我哋需要嘅係,當年玩遊戲嘅初心。
 
蔣薇
www.fb.com/maydreaming
 

COMMENT