2017/09/08

《藍天夏日唔去Camp?》

2017_09_07_may menclub
 
網上資料圖片
 
行過信和一樓見到一堆渡假屋仲生存,就回想返N年前去Camp嘅日子……
 
今日你叫我去渡假屋?唔好玩啦!一間又殘又舊嘅屋,沖涼又唔夠熱水又唔乾淨,想煮個飯都唔敢用佢哋嘅餐具,張床又無消毒,上一手玩過乜都唔知,連梳化都有蚤,電視都係大牛龜……住一日渡假屋就好似玩緊人在野咁,係一種挑戰。
 
但仲年輕嘅你,面對再惡劣嘅環境,你都一於懶理,仲懷住興奮心情入去,帶住一車車回憶出返嚟!
 
細個時幾難得先可以出街玩幾日唔返屋企,仲同一班同學一齊入Camp,裡面有好兄弟,有仆街同學,仲有機會有暗戀緊嘅女仔,絕對係一套史詩級愛情動作片嘅前奏,你話點唔興奮先得?
 
人,永遠都係最重要,同一班好玩嘅人一齊,你喺海旁吹水吹天光都係開心,同唔夾嘅人俾你去食米芝蓮三星都無意思。
 
就係因為呢班人,去Camp先有意義,你仲記唔記得,十幾人一齊喺超市掃零食汽水?浩浩蕩蕩咁坐巴士或船入去,一齊放低物資開行冷氣,然後商量幾時落沙灘,再喺沙灘玩數字球,租隻香蕉船放班女仔上去再一齊反轉隻船,大家濕晒咁返去,再輪個廁所,男仔仲要幾個一齊格劍節省時間,沖完涼就燒嘢食,總有人由頭食到尾,後期仲有酒精助興,當然唔少得比蚊叮到仆街。
 
夜深時份將所有床拉出客廳,圍個圈玩Killer,再玩Truth or Dare,戲肉上映,你有冇暗戀邊個?邊個同邊個打個車輪先,懷住忐忑嘅心,你希望同暗戀對像有一次親密接觸,又或者有個被迫機會同佢表白,Sorry,唔好彩嘅你只可以同個兄弟打車輪!
 
玩到攰,大家排排瞓喺廳,熄燈之後,黑暗上你哋展開激情對話,大家都只係聽到彼此嘅聲音,講吓往事,幻想將來,呢個黑暗中嘅對話將彼此關係提升到一個新高點,討論得比城市論壇更熱鬧。最後喺唔知咩嘅情況下,大家唔覺意咁瞓晒。
 
今日你想再去Camp?或者兩日一夜都有機會,你唔會再介意房價,唔需要死R爛R折頭,入到去你同條友講,俾間最豪最舒服嘅房我哋開心返兩日一夜,乜都值回票價。超市買嘢亦唔需要再左度右度,仲有人帶幾支靚酒入去。
 
人無變,關係變咗,暗戀對像可能結咗婚,兄弟帶埋老婆一齊,亦有同學要出Trip Join唔到,就算好唔容易齊人,大家都無咗當年嘅興奮,去海灘嘅步伐唔再輕鬆,亦唔再放膽,話題變得嚴肅,語氣變得保守,距離,亦遠咗,你唔講,我唔點明,大家心照。
 
見到學生興奮咁Book Camp,我諗起藍天白雲嘅夏日,應該係去Camp嘅好日子,但我依家喺邊?
 
蔣薇
www.fb.com/maydreaming
 

COMMENT