2017/09/22

《男人的飯腳》

2017_09_22_May menclub
 
網上資料圖片
 
男人的浪漫,豆腐火腩飯;仲有一種浪漫,係即叫即出嘅飯腳。
 
唔似女人,男人自己一個食飯無乜問題,但我相信每一個男人電話入面,都總有一兩個飯腳。
 
「等陣食飯?」「邊度?」「就你屋企附近啦!」「食乜?」「求其茶記啦!」「好」
 
對話簡而精,唔會好似約女朋友咁,要諗佢鐘意食乜,又或者佢呢排唔想食乜,甚至價位同地點都要搞一輪先確認到。
 
約食飯有好多層次:
 
第四等,一大班人食先會見到佢,食飯都唔會講兩句,平時你絕對唔會搵佢食飯。
 
第三等,一大班人食飯,你先會見到佢,但都可以吹兩嘴,之不過都係好見外嘅「最近點啊?」「工作如何?」「結婚未?」之類。
 
第二等,偶爾會一齊食飯,例如生日飯,特別日子,約要約好耐,平時食飯你絕對唔會諗起佢。
 
第一等,就係我上面講到嘅兄弟,臨時約,OK!地點,是但!
 
同第一等兄弟食飯,你好少會問最近點之類,因為你一定知佢近況,大家會閒話家常,最近睇緊乜劇好似幾啱你口味喎,新聞時事嘢吹兩句,天文地理都講一餐。
 
第一等人通常你都記得佢電話號碼,你唔會覺得約佢係困難,即使唔係次次都約到,但你唔會Feel Bad,更唔會影響到下次你再約佢食飯嘅考慮。
 
同兄弟食飯,你係可以成程都唔睇電話,因為個話題都已經吸引到你,大家極啱嘴型。
 
你會諗,食飯咪又係一餐,但同一個好傾嘅人食飯,餐飯唔再重要,因為重要嘅係食飯嘅時光。
 
食完之後,或者會係四周圍行吓,我陪你等車,唔係好似送女朋友咁痛苦,而係開心的,行呢幾步,大家吹多兩句。
 
同唔熟嘅人好多時都會講客套說話:「不如去食糖水啦!」
 
但同兄弟就唔會,我哋唔需要用食糖水去延長時間,要見,過兩日再約囉,有嘢想傾?去飲兩杯先講啦!
 
呢種自由,呢種舒適,係好難從其他人身上搵到。
 
問吓你自己,如果今晚突然想搵人食飯,你會諗起邊個?
 
蔣薇
www.fb.com/maydreaming
 

COMMENT