2017/09/29

《K房唱出真兄弟》

2017_09_29_蔣薇_MenCLub Column_
 
網上資料圖片
 
唱K,真係一種好考人際關係嘅社交行為,斗室之中,大家無位走四下無人,要靜靜地「欣賞」或者「承受」對方歌聲,更要展露你震驚六十億人嘅聲線,一對新朋友,好可能喺一次唱K之後絕交,亦可能成為莫逆之交。
 
假設你同三個唔太熟嘅朋友唱,入房,無人敢點歌,不如叫吓嘢食先?先出手嘅,通常都係有少少自信,即使唔係好聽,都唔會太難聽,唱嘅一定係K歌類,中音多,簡單,例如周柏豪都唱到嘅歌。
 
係第一首歌打響嘅戰鼓,大家開始會進入分析狀態,審視一下自己比起呢位仁兄好定差,好嘅就係時候Show Off,差嘅就再睇情況。
 
食物送到,中場大家休戰,輪住唱無乜壓力,但食完之後戰場會變得更激烈,因為你再無食嘢呢種藉口,而大戰亦開始爆發。以下分出兩個大情況,如果大家都仲係好含蓄的話,就慢慢唱完散;相反,如果遇到好對手的話,就係時候展露歌喉,有咩飲歌要出就係依家,即係嗰種你練到爐火純青嘅戰歌,有低音,有高音,難唱,就好似張敬軒、林俊傑之類。
 
戰力低嘅,通常都會開伴唱或者跟人一齊唱,一個唔好彩遇到戰力低但又好有自信嘅你就慘,我曾經聽過一個全走音版嘅不能說的秘密,唱嘅人好有感情,合晒眼,但又走晒音,你要忍住笑,只可以同其他人四目相投,交換一個以後唔同佢再唱K的共識,最攞命係,佢唱完仲好有滿足感,好想重唱喎。
 
唱K,分好多種,陌生人社交大家都係點到即止,但有某幾個人,你會同佢哋兩條友唱K,熟到一個你唱乜歌都唔會令呢段友情消失,仲會加深兩人之間嘅牽絆。
 
我有個朋友,佢可以唱「千年之戀」,但佢係一個男仔,都算,問題係,知呢首歌嘅都知呢首係男女合唱歌,超高音,而佢……係會唱埋女聲……更重要係,佢無咁高音,一路聽呢首歌,一路我個臉皮都不自主地跳動……
 
為咗回敬佢,我都不得不挑戰神曲「死了都要愛之升兩Key版」,你會問,嘩,你咁勁咁都唱到!錯!係正常版都唱唔到,但為咗彌補頭先耳膜嘅傷害,我都要出招摧毀對方。
 
假如外面有人經過,應該會當我哋係痴線,兩小時完結,出到嚟相對而笑,因為你已經出唔到聲。
 
如果,你有一個朋友,可以令你放心地唱一首你完全唱唔到,平時唔敢唱嘅歌,呢位就係真兄弟喇!
 
蔣薇
www.fb.com/maydreaming
 

COMMENT