2017/10/06

《男人三十之樽頸》

116
 
網上資料圖片
 
男人三十,事業開始上軌道,生活亦開始平穩,進入管理層人工唔錯,工作亦無咁吃力,理應係開心嘅時間,奈何,好多人喺呢個位,都會變得空虛、迷惘,或者係一個中年危機,大家開始諗前途,諗呢十年係點,再之後十年都係點。
 
已經唔再係Fresh嘅我哋,少咗好多幻想,講多咗實際,望住今日嘅人工,唔錯,但身邊亦有人比自己高;再望望自己份工,好似又用唔盡自己嘅力,究竟自己可以去到邊個位?我哋會猶豫,亦好有衝動去試。
 
呢個時期,不外乎三樣,轉工、轉行、做老闆,三張嘢嘅三件事,要放棄你今時今日建立嘅嘢,你有負擔,但為咗行一條新嘅路,你敢唔敢去嘗試?傾計時都會開始講同呻今日嘅景況,呻,唔係因為慘,而係因為對於將來嘅憧憬加上不確定性。
 
三張,你有經驗、有人脈,最重要係仲有魄力,你要轉,真係要轉,再過幾年,到你三十尾時,你擁有更多經驗同人脈又點?你已經唔敢再去闖,因為你負擔太大,衰咗,你就玩完,咁就一世。
 
事業係男人最重要嘅一環,有事業,你個人睇上去都會精神,但你打份牛工,沉淪喺安樂之中,負擔就好似你嘅體重一樣,累積落去就再行唔郁。
 
樽頸位,就係你keep住行,但前進得唔夠快,每個人都會遇到,當你發現呢個樽頸時,你就會諗,究竟係呢條路行唔通?定係你自己行唔到?
 
望吓喺樓下公園飲住啤酒嘅中年大叔,過幾年你會唔會同佢一樣?再諗吓係中環Banker Club飲緊紅酒嘅中年男人,唔駛諗你都知想做邊個!
 
問題係,點做先可以做到?
 
轉工,去到一個新環境,會唔會好辛苦再去熟悉一個地方?
轉行,去到新一行,你要重新嚟過,自己仲有冇熱情去適應?
做老闆,All or nothing的選擇,你敢唔敢盡地一鋪?
 
無人話你知呢個答案,大家坐埋一齊飲兩杯,都有好多想法講,難在你點去實行,敢唔敢行出呢個Comfort Zone!
 
好多人咁就一世,包括你身邊長輩就係人辦,亦有人轉死咗,得到更差嘅下場。
 
人生下半場,你想點打?
 
同運動一樣,下半場,大家體力下降,要贏,靠嘅係經驗同魄力,我哋唔再好似後生咁衝,亂打一通,我哋開始講策略,講技術,講分析;有班人會開始放手,求其打完當算數。
 
十歲,我哋睇學業前途;
二十歲,我哋睇事業錢途;
三十歲,我哋睇人生前途。
 
三十而立,我哋第一次認真地思考自己人生係點,為自己而諗,而唔係為父母,為錢咁簡單。
 
蔣薇
www.fb.com/maydreaming
 

COMMENT