2017/10/20

《四十路愛人》

30455670336939383279
 
網上資料圖片
 
發咗個惡夢,我知點解,因為早兩日喺街見到一個四十零歲嘅女人,有少少似我女朋友,當時心中笑一笑,話唔定佢過多二十年就係咁嘅樣。點知就發咗個夢,夢見我身邊嘅佢已經時光飛逝成為一個四十路……
 
人會老,話就話男人永遠都喜歡十八廿二,但問題係喜歡還喜歡,所謂閉起雙眼掛念誰,眼睛張開……
 
兩個人一齊,係一種學問,七年之癢捱得過,十七年呢?二十七年呢?你老之餘,身邊人都一齊老,佢唔再係一個美艷動人嘅青春少艾,而係一個開始年老色衰的師奶。
 
望吓自己父母,長輩,佢哋係最好人辦,已經兩人攜手一齊渡過幾十個年頭,每日張開眼見到嘅就係枕邊人,佢唔會引起你有食早餐嘅慾望,但佢會為你煮一餐真正嘅早餐;煮飯亦唔會著真空圍裙令你想有背後攬住佢嘅衝動,而係一身油煙味同埋素顏上陣。
 
愛情變感情,再變親情係一種過渡,講真有返咁上下年紀,你仲會唔會去睇網上愛情呻吟Page?聽講到口臭嘅兩性衝突,同埋點樣維繫一段感情?唔會,因為你哋已經過晒呢個時候,等於今日你見到人仲講暗戀苦戀,就算齋睇你都只會笑啦。
 
四十路,吸引你嘅唔再係外在,你真真正正,堂堂正正,大大聲聲咁同你老婆講:「今日我可以發誓,我真係為你內在而愛你!」當然你無講到心入面句「因為你外在已經唔係賣點嘛」,當情人由偶像派變成實力派,都真係一種過渡,有幾多藝人可以偶像走到盡頭,劉華?朝偉?人哋叫外在內在都有嘛,你敢唔敢講一個過四十都仲係只Sell外表聽吓?無囉!
 
時間一長,好多嘢都變成形式,特別係婚後,我聽過一個朋友結婚五周年,竟然無慶祝活動,反而出嚟同我哋飲嘢,感情唔係自然存在,反而係要維繫,大安旨意,即係代表感情退減。
 
好多人去到四十幾嘅時候已經好似陌路人咁,只不過係親人,係一種悲劇。
 
賤人必有可恨之處,愛人必有可愛之處。
 
今日你好好記低,點解你會愛呢個人,點解你肯同佢走到今日,到大家四十幾五十時,你拎返呢句嘢出嚟,審視一吓呢個人,重溫一吓點解會愛佢,再諗吓你以前會做嘅嘢,今日係唔係做少咗,無做咗。
 
愛情,應該係歷久常新,二十又好,三十又好,四十又好,即使去到七十都好,佢已經變成一個阿婆,但你都願意牽住佢手,閉上眼,幻想曾經拖住嘅佢;張開眼,原來已經同你咁多年了。
 
閉眼,想嘅係嗰個青春少艾嘅妳;張眼,睇到嘅係嗰個同我走過多年嘅妳。
 
兩個人,原來係同一個。
 
蔣薇
www.fb.com/maydreaming
 

COMMENT