2017/10/27

《愈叻嘅男人,愈唔會話自己叻》

2017_10_27_May
 
網上資料圖片
 
有個女性朋友,佢有個好大男人嘅男人,呢位仁兄乜都要認叻,覺得自己天上有地下無,最近呢位女性朋友佢升職加薪都唔敢同佢講,因為佢知一定會炒大鑊。先唔講呢位叻哥係唔係真係叻,但佢嗰種做乜都要認屎認屁,唔識唔熟都要插口,說話真係好刺耳。
 
叻,係無錯;勁,亦無罪。
 
之不過世界好大,你有冇可能叻晒?當你去到某個水平,見識到真實世界之後,你會發覺叻人大有人在,你可以喺某一個範疇叻已經好勁,但你要去到乜都勁,最後只得到樣樣都唔掂嘅下場。
 
男人,切忌認叻,我識唔少勁人,但愈叻嘅,唔會覺得自己叻,更會比其他人更謙虛,更有禮貌,呢個係修養問題,更係眼光問題。
 
頭先位仁兄,係一場飯局入面,大家講吓風花雪月,但佢就硬係要搭嘴,搭都算,你唔好吹水,最後有位朋友忍唔住口,因為佢喺呢方面真係好擅長好有經驗,一聽就知佢吹水,更想教訓一吓佢,就當住咁多人面講:「你頭先講嘅嘢,其實係錯,已經有好多報告同分析解析原因,你喺邊個權威身上知道呢樣嘢?作出呢個結論?定係個權威就係你?」
 
無料條友當然被問到口啞啞,支支吾吾咁講咗幾句唔知喺邊度睇到,佢女朋友都搵咗個下台階比佢,咁大家俾面女仔,亦無再串落去。
 
過幾日之後,兩個人分咗手,因為當晚我哋成班落佢面呢件事,令佢好不滿,佢要求佢女友唔好再同我哋咁多來往,明眼人一睇都知關我哋鬼事,你柒咗唔認都算,仲怪人串你,今日俾自己人教訓,好過比外人教訓啊!
 
咁個女仔當然唔肯,然後就嘈,嘈嘈吓就連升職加薪件事都爆埋,爆完之後?就無之後喇。
 
叻,分開三種層次:
 
一,你覺得自己好叻;
二,唔叻嘅人覺得你好叻;
三,叻嘅人都覺得你好叻。
 
叻唔叻,唔係自己講的,因為人哋有眼有腦,你係點嘅人,口講一句,心講一句,自有公論。
 
如果叻到要改自己個名叫阿叻,一係佢真係好叻,二係佢傻到覺得自己配得上個叻字。
 
蔣薇
www.fb.com/maydreaming
 

COMMENT