2017/11/03

《如果XXX做你老婆,你一日點過?》

2017_11_03_蔣薇MenClub Column2
 
網上資料圖片
 
好多呢種題目,將女神代入做你老婆,究竟你會點?通常都係咩起身食早餐,然後真係食早餐,臨瞓前上床瞓,真係瞓呢類好Juicy嘅幻想。
 
可惜,現實通常都係殘酷,你想得愈多,就跌得愈痛。
 
以下內容由幾個不會露面,亦唔會承認係我朋友嘅朋友所憶述:
 
「食早餐?八點要出門口,你叫我七點起身食早餐?就好似叫你朝早起身落街跑步咁,要好有心情,一年唔知有冇一兩次囉!仲要大家未刷牙,唔好話食早餐,打個車輪都唔好預我。」
 
「你知唔知一個女人平均一日甩幾多頭髮?每日沖涼我就要幫佢執頭髮,如果唔係?會塞渠!而佢永遠唔會自己清!仲有啊,屋企地板、床,全部都係頭髮,我拎住個吸塵機見到頭髮就眼冤!佢仲要大安旨意咁話,你唔清,唔通我清啊?廁所塞咗都係你通,你諗你喇!」
 
「馬桶向上定放落?This is not a question,因為最近我已經訓練咗自己坐喺度去小便……彈到小小落地板?以前求其沖沖咪算囉,佢監住我清潔、消毒、由乾到濕再到乾,差少少叫我用脷去證明係乾淨啊!你班粉腸上次上我屋企,地下嗰幾滴知唔知我解釋咗幾耐,清理咗幾耐!?」
 
「成日話男女平等!家務又平唔平等?係平分啊,洗衫你、晾衫我、摺衫我、拖地你、洗碗我。然後我做完自己嘢,攤個人喺梳化啱啱打開部機,佢就會黑我面話,你咁得閒唔幫我手嘅?知唔知我返工好辛苦?大佬啊,我返工都辛苦啦,何況大家分咗工作,我嗱嗱聲做完就係為咗可以打吓機,估唔到你又要我做埋你嗰份!」
 
「最慘係,夜晚想要,聽日要返工唔要得,聽日有嘢做唔要得,攰唔要得,親戚到唔要得,你將幾個條件加埋,仲難過當年擇日啊!最後咪叫我自己打飛機,點知俾佢發現又嬲我喎。」
 
「兩個人一齊住真係好大壓力……你幻想吓有一個人無時無刻都好似睇你唔順眼咁,又唔會同你講道理,你更無得同佢反駁同爭論,真係同以前侍奉皇帝一樣,有把刀喺你頭上面,你唔知幾時會跌落嚟。」
 
每個星期見到呢班「抑壓的人夫」,佢哋點忙都會抽時間過嚟飲兩杯,傾吓計,因為呢幾個鐘,佢先呼吸到自由,先感受到自我,同其他深受其害嘅人夫一齊互相勉勵。
 
婚前啪啪啪,婚後啪啪啪,分別在於,前者係肉體的衝擊聲,後者係手掌撞面嘅激烈碰撞。
 
女神之所以係女神,因為你從來無見過佢痾屎,當你每日同佢相處,見盡佢一切凡人舉止,你就會發現原來佢都係人。
 
再問落去,你肯唔肯同呢個人走落去?
 
人夫們表示,今晚再夜我都會返屋企。
 
蔣薇
www.fb.com/maydreaming
 

COMMENT