2017/11/10

《價值一百萬嘅藍眼白龍》

2017_11_10_
 
網上資料圖片
 
喺日本有一個爸爸,為咗小朋友嘅幼稚園學費,變賣咗佢四張全球限量1000張嘅藍眼白龍咭,令唔少男人感到唏噓……
 
玩具、收藏,從來都係被虎視眈眈嘅目標,由細個被阿媽用成績威脅你,到大個女朋友千方百計想丟咗佢,今日大家已經到咗一個做人父母嘅年紀,被迫要讓出空間,原來嘅書房(打機房、模型房、音響房),變成一個兒童房,而你就要犧牲一批收藏。
 
上網你唔難搵到一套一套嘅收藏出讓,睇佢哋嘅描述:「割愛出讓,價錢其次,最緊要有一個真心識欣賞嘅朋友收藏,單身優先,有小朋友免問」,深深感受到佢哋嘅切膚之痛。
 
香港嘅土地問題已經唔單止係男女之間,更係三次元同二次元嘅衝突,無錢無位?Sorry,你連捍衛你嘅收藏都唔得!
 
有個朋友好喜歡收藏Figure,一隻差唔多40cm高嘅神奇女俠,錢都係其次,好似養車咁,你一筆過俾,第時升值賣出去仲可能有賺,但係你養車唔平,以一尺一萬嘅價錢,放租5%。即係你每年都要付出500蚊去做放置成本,一呎疊起當你放4個,即係每個每年125,你放十年,都已經係成千幾蚊。
 
睇到呢度,你肯定會覺得我太計算,同班女人有咩分別,根本唔明白男人嘅浪漫!
 
我明,我真係明,更好明白其中嘅掙扎,我哋唔講錢,但世界係唔係唔同我哋講?唔係,現實我哋仲要面對講錢嘅世界!
 
所以有朋友努力搵錢,係想擁有一個無須計算嘅生活,可以有一間書房之餘,仲可以有間房比小朋友;可以供小朋友讀書,又可以供車供樓;可以買包包俾老婆,同時買遊戲機俾自己。
 
錢可以解決你太多煩惱,勢利啲講,無錢嘅話,你連講句嘢都無咁大聲;而當你有錢時,你可以大大聲話,你唔比我放?我出去租個單位放都仲得!
 
好多人話人大咗要學識妥協,係,因為妥協係最易,只需要心理調整,唔需要付出太多。
 
但我覺得人大咗,要學識「WHY NOT BOTH?」
 
我要晒,當然最好,但係唔係咁易啊葉師傅!
 
你入唔到佢中路,唔頂佢幾拳,唔捱唔痛,咪成為失敗者囉!
 
台上一分鐘,台下十年功。你唔準備花上大量時間心血同痛苦,邊可以好輕鬆咁講一句「WHY NOT BOTH」!
 
今日幼稚園要你四張藍眼白龍!小學呢?中學呢?大學呢?你仲有幾多可以拎出嚟變賣?
 
生活?原則?尊嚴?
 
最後你只留下你嘅軀體,但你,已經唔再係你。
 
蔣薇
www.fb.com/maydreaming
 

COMMENT