2017/11/17

《叔叔!?哥哥啊!!》

maxresdefault
 
網上資料圖片
 
唔少朋友都生咗小朋友,小朋友天真無邪,咁話晒佢都係後輩,正路都會叫你做叔叔,但其中有人唔肯認,不斷叫人叫自己哥哥。
 
地鐵讓座都係,唔該叔叔,聽到個心都有少少唔舒服,做咗件好事,但受到無情歲月折磨……
 
有朋友唔肯認老,每次都會好執著係哥哥,喺旁邊睇,我又覺得叫你叔叔無錯。
 
究竟點為之叔叔,點又為之哥哥呢?好難界定,年齡?唔通次次睇你身份證夠唔夠三十?外表,咁你十八好似二十八咁,又真係幾難受嘅。
 
計我話最重要係心態!一個年輕嘅心態!
 
上面提到好執著嘅「哥哥」,喺我眼中,你開口埋口都一個老屎忽樣,又唔同小朋友玩,訓話多,唔客氣咁講句,你咁老套,仲想認自己係哥哥?醜唔醜?
 
人大咗有工作時,生活都趨向穩定,做開繼續做,新嘢?唔試喇……輕輕鬆鬆休息吓唔好。慢慢你就會同個世界脫節,當年你睇數碼暴龍聖鬥士,你知唔知今日播嘅卡通係乜?當年你玩嘅遊戲,今日小朋友又會唔會玩?
 
世界變,我哋好努力咁將舊人舊事舊物保留,希望將當年留住,即使係向細過我哋一輩嘅人都好,都想佢哋認同我哋嘅年代,我哋嘅想法,無形中就成為一個老屎忽,要人接受你套嘢。
 
但有冇諗過,當你仲年輕時,會唔會係咁想當年?中學時你每接觸一樣嘢都係新,都會嘗試都會接受,今日你仲會唔會似當年咁試?不了。而當你停止向前行,跟上社會節奏時,你就會成為步伐緩慢嘅「叔叔」,一邊走,一邊講當年自己幾威。
 
好似我老豆咁,佢只會聽舊歌,當年我聽周杰倫,佢走埋嚟講:「都唔知佢唱乜!嗱,你聽吓我呢啲先係歌嘛!」今日你見到KPOP,可能都會講返同一句說話,只不過係由譚詠麟變成陳奕迅;由周杰倫變成BIGBANG。
 
人生一邊行,一邊背負得到嘅嘢,走到咁上下,你就再拎唔起新嘢,何不將舊事放低,接觸新事物。
回憶就好似陳年佳釀,年輕人唔會欣賞,你想年輕?同佢哋飲吓啤酒就得,而佳釀,當然係一個人夜深時,獨自回味。
 
蔣薇
www.fb.com/maydreaming
 

COMMENT