2017/11/24

《沒有最強的角色》

2017_11_24_蔣薇MenClub Column
 
網上資料圖片
 
每個遊戲都總會有OP角色,即係Over Power,比較強勢嘅角色,網上有唔少攻略,講點樣屈機,點樣通關,但係,「沒有最角的角色,只有最強的玩家。」
 
我係信奉呢個原則嘅人,有少少包拗頸,喜歡用一個公認弱勢嘅角色,打出優秀嘅成績。
 
用一個強勢角色打機,贏咗有意思嘛?都有,但用弱勢角色你都打,一開局時被隊友、被對手無限奚落,話你用呢個角色輸硬,話你會拖累成隊,話你唔識玩,話你陀衰家之類。
 
每次聽到呢種說話,我都會一笑置之。
 
男人嘅浪漫,係明知不可為而為之,通關只係一條最普通嘅路,遊戲可以從唔同角度去感受,有人會覺得無傷勝利先係勝利,有人造求快速通關,有人喜歡找尋漏洞。
 
而我,喜歡研究一個角色,每個角色都有佢自己一套打法,喺特定情況同組合之下可以產生強大力量,為一個角色研究一套獨有戰術,再加埋隊友一齊去實行,比起你單打獨鬥之下殺盡全場,有更大滿足感。
 
廢角,每次用都係一種挑戰,因為喺一開始你已經輸咗,而你只可以長期用逆風心態去做好每一個細節,去改善自己操作,去切合戰術。強角你可以犯錯,因為犯錯之下你都可以用強能力去挽回戰況,久而久之,你只會大意,因為你可以犯錯嘅機會太多,最後練壞手勢。
 
好似三國無雙咁,你打簡單模式自然無問題,但你去到地獄同修羅,就唔不能以一敵百,你要靠走位靠連招靠時間去計算一切。
 
成日見到有人用強角,再睇睇勝率先得50%左右,我心諗你用咁強勢嘅角色都只有一半勝率,證明你操作有問題,而俾呢種人問候我隻廢角時,都係一種侮辱。
 
潛心使用一隻角色,因為愛,對角色有愛,你總會發出超人水準,但你只追求強角,一旦調整、削弱,你就改用其他強角,你嘅水平亦只能喺同一個地方打轉。
 
而我最怕嘅唔係強大嘅對手,唔係弱雞嘅隊友,而係官方將角色能力調高到極OP。
 
每次入場,都見到自己練咗成年嘅角色被人Pick/Ban,心中不其然流眼淚,好似自己一直守護嘅女神淪為公廁,瘦田無人耕耕開有人爭。
 
有朋友話,打機做乜有咁多堅持,點解咁認真,我望望我自己幾百場嘅戰績,心諗,贏輸唔重要,但自己嘅堅持,先係最寶貴。
 
蔣薇
www.fb.com/maydreaming
 

COMMENT