2017/12/01

《99%男人都講過嘅大話》

1510032440_2a0d
 
網上資料圖片
 
有朋友就嚟結婚,未婚妻突然話要重新考慮結唔結婚,大家都猜度佢係唔係犯咗「每個男人都會犯嘅錯誤」,而佢承認,佢講咗一個大話,因為佢同未婚妻話瞓,點知俾人捉到佢無瞓,唔係出去偷食,而係打機!
 
「我瞓喇!」呢個大話,真係99%男人都講過,你問十個,九個都唔可以有邏輯咁講出嚟,點解要講一個咁無聊嘅大話。
 
「因為唔想同女朋友煲n個鐘頭電話粥囉!」
「因為想打機,又唔想俾女朋友知!」
「因為女朋友唔俾佢打機!」
「因為一打機就比女朋友鬧!」
「因為打機係小朋友行為,你咁大個人仲打乜機!」
 
打機,係男人嘅天性,亦係男人嘅原罪。
 
你打機,就係不務正業,無論你做咗幾多個鐘頭嘢,只要你一打機,就係貪求逸樂;仲細咩?咁大個人仲打機?打機同睇書睇戲上網煲劇都係娛樂,點解你睇韓劇又得,我打機又唔成熟?男人要成熟,係用工作去表現,唔係用工餘時間去表現吧?打機好緊要咩?唔停得?唔可以遲少少先玩?唔可以唔玩?得,但我開局你先叫我停,我會俾隊友同兄弟鬧爆,點解你唔早少少講,或者等我打完呢場呢?作為一個有責任嘅男人,完成一場完整遊戲先係成熟表現!
 
總之……你打機就係錯。而你用幾多理由去解釋都好,女人都唔會理解,更唔會同意,最後淪落到要扮瞓,先可以擁有少少自由嘅時間。
 
當事人話:「我未婚妻話佢唔可以信任我,因為呢種咁小嘅事都呃佢,點知第時會唔會呃佢其他嘢!」
 
講大話,係死罪,但問題係,講大話總有原因,兩個人一齊,都應該有自己自由自己時間,點樣可以迫一個人講大話?就係你控制佢,令佢少少自由都無,最後佢只會講大話脫離你嘅控制。
 
我哋同呢個朋友講,如果你準備同一個人結婚,你係要用大話去擁有自己空間,而佢唔欣賞,唔陪你做自己喜好都算,佢仲唔俾你,唔理解你,咁呢個人你仲可唔可以同佢一齊過埋下半世呢?
 
最後我想同女士們講。
 
一句:「唔好玩咁夜啊」。比起千萬句道理更有用,比起甜言蜜語更甜。
 
蔣薇
www.fb.com/maydreaming
 

COMMENT