2017/12/22

《退休》

2017-12_22_蔣薇MenClub
 
網上資料圖片
 
最近好煩惱,因為爸爸已經到咗退休年齡,仔女都出身,應該係時候退休,而佢工作上又做得唔太開心,咁大家咪一齊商量吓退休嘅事,基本上全家人都贊成佢退,但問題係,問到佢退休有乜做,佢答:「係屋企坐吓瞓吓。」
 
其實,呢次唔係第一次傾,佢之前亦退過一排無做嘢,正正喺屋企坐同瞓,原來一個男人無嘢做,個人好易老,望住佢個人一日比一日頹,大家係真心驚,今次佢再提出,我哋都好嚴正咁話,如果係咁,就唔好退,寧願你每日返工放工有嘢做。
 
退休係一件好夢幻嘅事,每個人都會幻想,當你有洗唔盡嘅錢時,當然可以環遊世界,但事實上有300萬比你喺手退休,你60歲又可以做乜?每個月用2萬,12年半就會用晒,到時你72歲,身無分文?
 
原來長命都係一個煩惱,知自己有幾耐命,睇住嚟洗其實好易,但唔知情況下,你洗多又驚,洗少又蝕,退休,唔係你想像咁簡單。
 
同埋每日諗點洗錢,其實都幾無聊,唔好講六十歲,三十歲你想搵個伴同你行街食飯唱K都難,兄弟們結婚結婚生仔生仔,好彩一個月見一次,唔好彩就一年一會,到你六十歲時,阿邊個行唔到,阿邊個要睇醫生,阿邊個走咗,仲有幾多朋友?打開電話簿,都唔知搵邊個好……
 
人生行咗一半,唔似小朋友幻想將來工作係點,而係開始驚以後老咗會點,當你認真諗,真係會好煩惱。
 
人老咗,最可怕係,朋友想約約唔到,被工作磨滅到興趣都無埋,身體機能跟唔上,無咗魄力去衝,連享受都無衝動。
 
我曾經有支靚酒保存喺屋企,諗住N年之後同班兄弟嘆,但N年之後,又有幾多兄弟仲喺度?
 
返返正題,追逐多年,真係俾你休息,你會選擇做乜?今日我哋有氣有力,當然仲有選擇。
 
好多人營營役役多年,將生命獻比工作,最後一無所有,今日記得,唔好丟低你嘅興趣,唔好放棄你嘅夢想,唔好忘記你嘅朋友,一切一切,要好好經營。
 
蔣薇
www.fb.com/maydreaming
 

COMMENT