2017/12/29

《人渣》

2017_12_29_蔣薇MenClub Column
 
網上資料圖片
 
題目好簡單,兩個字,人渣。
 
我好少用呢兩個字,賤人、垃圾、仆街好常用,但呢個人,我聽到只能用人渣去形容,絕對係女人痛恨,男人都睇唔過眼!
 
話說我有個女性朋友,叫佢K小姐,同一個男朋友七年有多,都三十歲,係時候談婚論嫁,男方叫佢……人渣先生啦,人渣先生一直都未有結婚打算,咁K都無迫佢,咪儲吓錢先,人渣佢有車有樓,唔算有經濟壓力喎,突然有日,兩個人分咗手。
 
感情,合則來不合則去,兩個人都有責任,安慰K時得知,人渣有第二個,OK,咁大個人有第三者呢樣嘢好平常,咁咪分手囉,會搵第二個即係有嘢你俾唔到佢,要第二個去滿足,散都係好事。
 
分手並不可恥,渣點係,佢點處理呢段感情。
 
賤男佢有日話要冷靜吓,因為佢覺得結婚好大壓力,覺得自己未Ready,需要時間,冷靜唔緊要,佢好堅持要收返之前俾佢嘅鎖匙,已經Feel到奇怪啦,果然,原來佢出面有小三,小三年輕貌美,理解,學成龍話,男人都會犯嘅錯。
 
愛上其他人唔係錯,錯係錯在你唔分手先再開展另一段感情,更錯係,你仲蠢到要俾人知道,更仆街係,人渣仲講到自己好大壓力,佢自己都唔想,佢好尊重呢段感情,想結婚,但只係未Ready,真係難聽過粗口。
 
做錯事,仲想扮好人,想結婚你就唔會有小三,仲要成年啦!想結婚你就唔會收人鎖匙,仲要帶小三玩到返屋企啦!
 
喂,你咁仆街,咪同小三雙宿雙棲囉!
 
點解係人渣,係佢一直唔肯放棄K小姐!小三入主之後,仲不停同佢講話自己一生最愛係佢,想同佢結婚,叫佢俾時間自己,嘩,你得一想二到咁樣,玩法係,搵個小三,俾大婆發現後分手,講到自己好可憐,仲想叫大婆做返佢小三,齊人之福咁。
 
間期佢又喊又盛,又等收工,管接送;但同時同小三睇戲食飯睇演唱會,仲Plan去旅行。
 
K小姐問佢想點,佢話想同佢一齊,咁K小姐即時話,你同小三去旅行嘛,你唔去仲有得傾,人渣一口答應,但明顯佢得個講字,過兩日仲用K小姐買嘅演唱會飛去同小三睇,除咗又食又拎我諗唔到第二樣。
 
人渣先生,我知你有睇我寫嘢,希望你睇到呢篇文,好好檢討吓,你以為自己係情聖啊?男人偷食我見唔少,男人有小三我知唔少,但男人之間,最多鬧你兩句叫你識返屋企就算。而你?偷到返屋企,仲想大婆變小三,仲要扮好人,仲要又食又拎,對唔住,我相信你身邊兄弟都唔會睇得過眼。
 
你呢種人渣,點同你做朋友啊?
 
我好欣賞佢其中一位兄弟,有次約食飯,人渣先生話自己有約去睇演唱會,有人睇唔過眼講咗句:「收聲啦人渣,無人想知你對狗男女做乜啊!」
 
我都想講,人渣先生,見鑊打鑊啊!
蔣薇
www.fb.com/maydreaming

COMMENT