2018/01/12

《真正嘅Pokemon大師》

網上資料圖片

仲玩Pokemon go?out唔out啊?想當年令成班人喺大熱天時由冷氣房行落公園捉寵物小精靈嘅Pokemon go今日點?我唔知啊,無玩好耐喇……

每日都有新遊戲,每日都有新鮮事,熱潮就好似潮汐漲退一樣,維持到一朝半日,大家追求嘅日新月異,今日嘅寵兒,只係明日嘅屍體。

我發現有個奇怪現象,間唔中都見有人玩Pokemon go,都有個特徵,就係中老年阿叔阿嬸,直到我見到一個真正嘅大師……

漆黑之中,佢用托盤平放四部電話,再綁上頸上,手指瘋狂咁撥動,當我睇清楚,原來佢同一時間用四部電話捉精靈時,我先感覺到震撼!今日仲有人玩Pokemon go,仲要用四部電話玩,仲要喺天寒地凍日子喺公園玩,仲要……係一個上年紀,唔知佢知唔知咩係Pokemon嘅阿叔玩。

遊戲好多,但令人一玩再玩,久而不捨嘅屈指可數,就算早排好出名要排隊入遊戲嘅天堂,今日已經無咗熱潮,被新出遊戲取代,周而復始。

有冇諗過,有時唔係遊戲問題,而係人問題?

簡單玩法嘅Pokemon go點解可以玩到咁耐?精靈捉晒,只係為咗練等級?身邊無人玩喇喎?原來全部都唔係問題。

返到屋企,我再問當時有玩嘅父母仲有冇玩,佢哋都話間唔中有,一開出嚟,個等級拋離我八個等級,須知道愈升愈難,不知不覺中佢哋離我咁遠,問題係,佢哋連邊隻寵物強弱都唔知,洗技能又無,仲唔識將佢進化升級。

成日聽到佢哋講:「嘩,呢隻比卡超有450分啊!」其實係指CP值,但佢哋只能當係分數,唔明咩係戰力,更唔知可以用糖用星塵去升分,當時我拎住佢哋部機,話:「睇吓啦,升升升,依家一千分喇!」

乜都唔知,乜都唔明嘅佢哋,玩得好開心,玩得好自在。

突然間我明白了。

原來佢哋就係昔日嘅自己,當年小朋友嘅我哋玩接龍、彈珠台都玩好耐,更唔駛講low到爆嘅DOS game,但以前無乜比較之下,玩得好開心,玩完一次又一次;今日我哋變得好挑剔,唔係遊戲帶唔到新樂趣俾我哋,而係我哋已經唔再擁有當初嘅童心,更失去耐性去體驗同感受遊戲樂趣,變成執著喺潮流興唔興,有冇朋友玩,有冇雜誌介紹等等。

今日我哋三朝唔埋就棄game,免費之下好多選擇,但一次又一次嘅百花繚亂只帶來無限的嫌棄,最後,更嫌棄咗自己。

望住Pokemon go大師,一手打四機,我明白到,今日唔係遊戲質素變咗,而係,我哋變咗。

蔣薇
www.fb.com/maydreaming

COMMENT