2018/01/19

《Metoo之禍》

2018_01_19_ may
 
網上資料圖片
 
今時今日想一個人身敗名裂?一句Metoo就可以做到。
 
風頭火勢之下,我都係戴返個頭盔先!
 
任何形式嘅侵犯都係不能容忍!
任何形式嘅侵犯都係不能容忍!
任何形式嘅侵犯都係不能容忍!
 
好,如果仲有人眼盲嘅,咁我都無嘢好講。
 
入正題,有女性受侵犯而肯企出嚟勇敢面對,令罪犯落網,係唔需要質疑嘅事,事件點解會有爭議?只差一步,就係由法律去執行公義。
 
無論上次呂小姐,又或者最近曾生事件睇,兩者都有個共通點,就係各執一詞,只喺網上發酵,大家口誅筆伐,俗少少講,口同鼻拗。
 
咩係公義?其實好模糊,法律暫時係大家所認知之中最公平公正,未必係你所認同,但你無可否認係無其他更好方式去評定。韓國電影《無聲吶喊》,以及日本電影《嫌豬手事件簿》,都係講述性侵,只不過兩個係反向,一個係去證實有罪,而另一個係證實無罪嘅過程。
 
《嫌豬手事件簿》道出原來被屈係幾咁無助,令人困擾,話比大家聽,唔係每一個嫌疑犯,都係有罪!唔講電影,台灣都有唔少風化案,例如女友聲稱被性侵,原來只係唔想比人知自己出軌;另外有學生屈老師犯侵,最後原來係誘惑失敗老屈,兩件案都最終還事主一個清白。
 
現今社會色狼、強姦比起打劫殺人更令人髮指,入冊會受到「特別」待遇,可想而知係一個幾大嘅指控。
 
但只要你上得法庭,就有機會比你喺一個相對公平嘅環境中辯護,可惜,Metoo在港變質為一個純網上指控,再配上網上起底、公審,事主一個對待萬千不問情由主觀的網上判官,係一個公義行為嗎?令人網上、現實身敗名裂,又是否洽當?
 
男性依家人人自危,唔知幾多年後前女友睇你唔順眼,就可以一句Metoo將你推上斷頭台,工作生活都不能自理。以前大家好流行玩一份「同意書」,終於成為一個令人笑唔出嘅笑話,亦有人話陳老師有先見之明,拍片影相證明大家自願仲玩得好開心。
 
講返正經,如果追求公義,應該喺現實中,應該喺法庭上,而唔係網上批鬥,加上一班判官去審,呢種唔係公義,而係行私刑。
 
蔣薇
www.fb.com/maydreaming

COMMENT