2018/02/09

《女人幫唔到,男人真係好辛苦》

working women 1
 
網上資料圖片
 
早幾日喺某女性論壇,有位師兄好睇唔開咁上去呻,內容大概係對於老婆不滿,其實佢放喺MenClub大把師兄會講,I Know That Feel Bro,只不過佢放錯喺女人群中,得到嘅係渣男同賤男呢個外號。
 
先講呢位仁兄話自己搵70K,多過佢嘅大有人在,但少過佢多多聲嘅人一定係大多數,背負住70k,係,我係話背負,你要得到幾多,通常都要付出幾多,收得呢個人工,邊有咁多easy money?俾老婆做全職媽媽,仲請埋工人俾佢分擔家務,已經盡晒責任有突。
 
但眼見你付出完之後,老婆仲未持得好頭家,有好多嘢要佢放工返嚟處理同煩惱,就好似你返工做好晒自己嘢,仲要花時間去幫同事執頭執尾,但同事唔同嘅地方係,佢唔會覺得係應份。
 
女士們,唔好活喺自己世界入面,見到有班姐妹撐就大條道理,係啊,撐你,你威你勁,但你根本無諗過你個老公係有乜煩惱同感受,你攞晒彩又點?最後兩人愈行愈遠,咪又係悲劇收場。段感情同段婚姻係你自己,先唔好講對錯,對方有意見,大家就要坐埋傾,女人唔係成日講,咩婚姻唔係一加一,而係0.5加0.5,兩個人一齊先圓滿咩?
 
其實我最憎聽到一句,咁唔滿意咪離婚囉!小姐,你幾多歲人?仲學埋班小妹妹玩分手?
 
提出一個問題,希望去解決,係男人嘅做法;
遇到一個問題,解決提出者,係女人嘅做法。
 
同你講問題,有冇人正視過?無,呢班人思考係從感情出發,現實夢境穿插,你唔會明佢個邏輯係點?你講東,佢會講西,如果落入佢哋個套路就會變成講東講西級數,然後成件事會被引導去另一個問題,原本你提出嘅事,就不了了之。
 
《論語》中提過「君君、臣臣、父父、子子」,講嘅係責任,每個人都有自己責任,你要盡力去完成責任咁先會穩定。一對夫妻,夫要做好丈夫責任,妻要盡好妻子責任,咩係責任?係兩個人去協議,去訂立。
 
文中妻子希望做全職媽媽,你嘅責任就係持好頭家,俾埋個工人你你都搞唔掂,大家都有阿媽生,每個阿媽都係咁做人阿媽,有幾多個有工人幫手?唔比較,因為同人比較無意義,既然你選擇做全職媽媽,就應該全力去做,無人一出世就識字,大家都係從學習中成長,剛剛出嚟做嘢係Junior,你總會有進步,可以完成更多責任更多職責。
 
處理唔到?咁咪諗辦法去處理?因為你選擇了責任,你就需要完成責任,你老公返嚟執你手尾,係完成你無盡嘅責任。兩個人一齊,幫吓得唔得?實得,但你要進步,你要上手,而唔係永遠停滯不前。
 
男人由出嚟做嘢到搵到今時今日嘅收入,係不斷進步,但當目睹身邊人停滯,一定會覺得有問題,有邊個唔想自己伴侶同自己一齊進步?
 
最後,我想同班口嗡嗡嘅三姑六婆講,愛一個人,可以為佢付出,可以體諒佢,可以愛鍚佢,但請分清楚,「愛」同「縱」嘅分別,依定唔係唔愛佢,係唔可以縱佢啊!唔想縱你,係為你好啊!
 
兩個人係伴侶,感情同家庭都係要經營,唔係天跌落嚟,亦唔係單獨付出。
 
蔣薇
www.fb.com/maydreaming

COMMENT