2018/02/15

《十年前的新年》

2018_02_14_蔣薇 MenClub Column
 
網上資料圖片
 
人愈大愈有種一年容易又過年嘅感覺,逢過年都會去拜年,會約返好耐無見嘅朋友,見吓一年一度嘅親戚,到年三十晚到年初一就會有種感覺,唉,咁就一年。
 
十年前嘅新年係點你仲記唔記得?當年大家拜年唔係用利是,而係用閃咭,你有幾多張?齊唔齊?大家追住有冇新閃咭流出,不經不覺,咁就十年,希哥已為人父,柏芝個仔都十歲幾仲離埋婚,連阿嬌都要嫁人……
 
正所謂十年人事幾番新,呢十年有冇諗過自己有乜變化?
 
可能當年你仲係讀緊書,
可能當年你仲係單身狗,
可能當年你仲會為買隻Game而煩惱,
可能當年你仲會為買盒Dom而尷尬。
 
十年,太久了,但亦太快了。
 
每年嘅拜年路線有冇改變?有一班人無再去拜年,亦有一班新人嚟拜年,身邊朋友要派利是,亦有可能你都派緊利是,甚至你有兩個仔女可以收利是,你會同佢哋講幫佢哋儲錢,將來俾返佢。
 
曾經會為新年而買衫裝身,好堅持要著新衫過年初一,打牌仲要著紅底褲,出街要笑,唔可以講唔吉利說話;過得愈多次新年,就愈覺得無以前咁重視,無咗種好興奮嘅期待感,或者係以前讀書可以放好耐假,依家年初四就要返去開工所以享受唔到,但就係有種感覺唔見咗,唔同咗……
 
收到父母嘅利是,通常係最大封,十年前你會覺得呢封利是好重要,因為你可以買到好多你想要嘅野;十年後你搵到錢,每個月你都會俾一筆家用屋企,呢封利是只不過係一筆不足道嘅錢,價值只係心意。
 
十年,你仲記唔記得當年新年有乜願望?
 
讀好書?搵好工?拍到拖?
 
十年後嘅今日,你有乜願望?其實咁大個人仲講願望,會唔會幼稚咗少少?的確係,但今年我有一個新年願望。
 
我希望,嚟緊十年,一切不變,又或者變少少好喇,再唔係,唔好變太多……
 
蔣薇
www.fb.com/maydreaming

COMMENT