2018/02/23

《賀歲片之謎》

2018_02_23_蔣薇MenClub Column
 
網上資料圖片
 
每逢過年都總會睇一睇賀歲片,今年就睇咗子華神嘅《楝篤特工》,想當年嘅票房毒藥,變成今日賀歲片之冠,都真係一個傳奇,好多人問,好唔好睇?好多人都會答,以賀歲片講,都算係咁,呢句嘢深思之下,有個好神奇嘅邏輯,大家會對賀歲片自動降低要求,正常講唔好睇,但掛住賀歲,就可以接受。
 
唔知幾時開始,賀歲片以大堆頭,搵一班大牌明星,加埋一堆星去客串就放出嚟,要劇情無劇情,要好笑,亦唔係真係咁好笑,要深度,更加唔駛諗,務求大家開開心心睇完就算,完場之後繼續行街食蘿白糕。
 
講真,有子華神加持,話咩十年磨一劍,劇本都改十幾次,卡士強勁,真係有所期待。
 
但預告片一出,真係覺得有少少不堪入目,俗語有話,再唔好睇嘅戲,預告都會好精采,但連預告都唔吸引,估唔到真係成套戲都爛到不得了。
 
一個毫無組織嘅陰謀,一個要扮毒男嘅特工,一個為愛瘋狂嘅保安局長,構成一個荒謬故事。
 
劇情穿插大堆港式潮語,笑話,社會現象,但眼高手低地輕輕帶過,大量角色為出而出只為一句對白抽水,主線故事唔緊接,劇情無反轉,最後壞人變好人,好人犧牲而不死,大團圓結局,得罪講句,仲老套過TVB。
 
為咗吹捧呢套戲,之前放出子華短片《旋風腿》同《賀歲片》,兩部用心同構思都遠超呢部「大卡士」「大製作」,最諷刺係,《賀歲片》入面講到大家唔知有乜好笑,但掛住賀歲之名就覺得好好笑,都入場製造票房神話。
 
如果以黑色幽默睇呢套戲,或者子華神正正係以《楝篤特工》去引證自己《賀歲片》嘅訊息。
 
想當年嘅賀歲片,有《家有囍事》《逃學威龍》《嚦咕嚦咕新年財》,都叫做有明星有劇情有笑位,但近年套套都係玩大堆頭,預告只強調有邊幾個明星出鏡,好似《我的情敵女婿》之流,成套只可以sell卡士,啊唔係,係sell客串,都難怪,無劇情無演技無深度,咪唯有以人多勢眾去堆砌。
 
有位智者講,賀歲片你唔需要創新唔需要經營,只需要做最老套最傳統嘅野,最後講句恭喜發財就得。
 
望住票房,套套都差唔多爆滿,無它,有假有時間有錢,咪求其搵套戲消費吓,呢個就係賀歲片生態。
 
其實我唔反感你拍套大堆頭賀歲片,但最難聽係你講到自己幾用心去製作,除晒褲,你俾咁嘅貨仔我?
 
唯有對住子華神,俾少少幻想,俾少少包容,打個冷震當應節。
 
如果呢套嘢你唔喺新年上?如果呢套嘢唔係子華神做主角?哈哈哈。
 
蔣薇
www.fb.com/maydreaming

COMMENT