2018/03/02

《成年利是》

2018_03_02_蔣薇MenClub Column
 
網上資料圖片
 
今年你逗咗幾多利是?二千?三千?五千?一萬?定係零?
 
成年後,收利是嘅歲月愈來愈少,當你結婚就會從逗利是變成派利是,一來一回你派出去嘅可能係二千三千五千。老實講,幾千蚊對於一個成年人算得係咩?交稅都無咗。
 
曾經好重視嘅拆利是環節,將每種紙幣分好再數,然後得到一個總數,再思考要用呢筆錢做乜,係一年一度嘅盛事,你可以用嚟買部遊戲機、新鞋、新袋、新相機,以前年初一一有錢就會想去買玩具,仲記得有年買咗套酒店大亨,然後同表兄弟姐妹一齊玩,家陣副棋都仲喺櫃入面。
 
但今年你逗嘅利是,可能放喺床頭遲遲未拆,因為一千幾百,猶如垃圾,面對幾十張廿蚊紙,你會煩點樣用晒咁多散紙。
 
你已經唔會再期待利是帶俾你新事物,平時你想買嘅野都會買到,你買唔到嘅野利是亦幫唔到,餘下嘅價值就已經係心意,來自長輩嘅心意。
 
我有個朋友,唔知幾時起,佢無再拆過利是,會將每封收到嘅利是寫好名,然後放埋一個地方,我哋忍唔住問佢點解……
 
原來早幾年佢老豆過身,新年都無打算慶祝乜嘢,直到佢阿媽拎咗封利是俾佢,話係佢死鬼老豆封俾佢嘅利是,接到呢封利是,朋友佢喊到豬頭咁,阿媽話佢老豆年年都會派俾佢,臨走前封定幾十年嘅利是交俾佢阿媽每年派比佢,除咗過年,生日都有。
 
佢老豆仲特別每個利是封上面寫咗年份、歲數、同埋短句,但可能佢老豆無乜文采,亦唔係多嘢講,第一封利是只係寫咗「新年要快樂」,呢封利是改變咗朋友嘅習慣,佢話每年都收少咗利是,因為會派嘅人愈來愈少,而總有一日你唔會再收到利是,變成派利是嘅人。
 
所以佢無再拆利是,因為裡面嘅五百蚊,佢唔急用,但利是無咗錢喺入面,就好似無咗靈魂一樣。
 
錢,係其次,祝福先係最緊要。
 
而就算你做咗幾多個小朋友嘅爸爸都好,你爸媽都會照樣俾祝福你,因為佢哋希望你來年順順利利,平平安安,喺佢哋眼中,你永遠都係當年收到利是好雀躍嘅小朋友。
 
蔣薇
www.fb.com/maydreaming

COMMENT