2018/03/09

《臨死前系列》

2018_03_09_飛虎出征
 
網上資料圖片
 
步入中年,人生分分鐘走過一半有多,特別係結完婚,大家已經開始討論點死。
 
朋友A話:要死一定要馬上瘋死,做個飽鬼先再上路;
朋友B話:我怕有日起身見到自己老婆無化妝嚇死;
朋友C話:我日日食煙,求就求自己肺癌死,起碼係自己揀;
朋友D話:點死都好,我得一個要求,靈堂入面我個人對上一定要舖滿牡丹花。
 
今個新年,完全感受到中年人對於死亡嘅體會,好多朋友講到明唔拜年,因為屋企有白事,甚至新年流流出入醫院,一個唔好彩,你同輩都走幾件,今時今日仲可以一班兄弟食煙飲酒講無聊嘢,係好難得。
 
早排我姑丈走,我老豆同佢識咗四五十年,係靈堂入面蓋棺,佢忍唔住大聲喊出嚟。姑丈以前成日同佢打牌刨馬食煙,兩個人Friend過打Band,故人離去,想搵個人傾心事都難……
 
好難想像如果有日自己朋友一個二個都走咗,想搵個飯腳、酒腳、煙腳都難,自己滿懷心事都唔知同邊個傾,同老婆?唔同感覺;同仔女?有代溝。每日好悠閒過日辰,時間多,但你再搵唔到在乎嘅人同你度過。
 
每個星期我都會同班老死聚個會,逢星期六準時出現係其中一個單身朋友屋企,將燈光調暗,要酒有酒要煙有煙,係無女人,成晚傾嘅話題好隨意,邊個諗到乜就講乜。
 
現實入面你好難暢所欲言,政治意見唔同都好,都可以傾一餐;夫妻性生活有問題又可以拎出嚟講;甚至你出面去滾去玩小三,大家都唔會企喺道德高地去話你,最多提你一句小心。
 
講死,太沉重,講返死前可以做乜。
 
有朋友話,早排佢同老婆去旅行搭飛機,見到前面有班男人嘈生晒,佢就好羨慕,因為一班兄弟去旅行係最開心,無之一,佢話:如果臨死前可以成班一齊去旅行就好喇!
 
因為佢呢句,大家都講出好多臨死前系列:
 
臨死前,我希望同大家搞個淫亂船P,大家帶個人出席就得!
臨死前,我希望同大家去一次郵輪之旅,二十日起嗰種!
臨死前,我希望同大家去返一次渡假屋,然後去沙灘玩數字球!
 
臨死前,我希望可以搵齊你哋,傾吓閒計,食支煙,飲杯酒,然後同你哋講句,兄弟我行先一句,再見。
 
蔣薇
www.fb.com/maydreaming

COMMENT