2018/03/23

《誠哥換女論》

2018_03_23_蔣薇MenClub Column
 
網上資料圖片
 
誠哥退休,有好多重要消息同市場期望,但我最印象深刻係佢提出:如果一個女人要有樓先同你結婚,不如襯後生搵過第二個。
 
今時今日結婚要有樓幾乎係一種潛規則,無論係你女朋友,定係你外母,都會執著係你有冇樓,公屋定私樓呢個問題上面,你有層樓,一切都好辦。
 
但細心諗吓,作為一個正常努力嘅男人,大學畢業後搵萬幾,到你三十左右搵到三萬左右,七年時間拎個平均數每月儲一萬,先叫勉強有84萬,叫做剛剛上到車,而你點儲呢一萬?辛酸痛苦少不免,家用呢?保險呢?交稅呢?
 
男人要買樓,唔係唔得,係難,難到極點,一人獨立買到樓嘅都唔係普通人,但好多女士會視之為正常、必須、老馮、基本。
 
女人拜金又好、要樓都好,都係一種選擇,大把富豪可以隨手一層樓送比人,只要你有價值,何謂價值?樣、年輕、身材、內涵等等,但男人都係膚淺,只要你個樣夠殺,其他因素都唔算大問題。
 
而一層樓價值三百萬左右,究竟相對女人要付出嘅價值係幾多?我估最少係IG Post相會有300 Like以上嘅水平、三十歲以下、身材352635、大學畢業以上,咁的確係值一層樓。
 
我知,有人會覺得愛情同婚姻點解要咁計算?嗱,我就好公平嘅,你要有樓,即係有計算,你算人時人亦算你,好多女人會話,愛我,就要為我付出,同時講愛我,就要接受我一切,簡單講,就係你要付出時我唔需要。
 
誠哥講得好,如果要有樓先肯同我一齊,計算一下買樓嘅難度指數,再計一吓換一個無呢個要求嘅可能性,換女好似比搵舊錢買樓容易;延伸落去,如果我有能力買樓,計一下你值唔值,就會發現你買呢層樓可以夠條件搵個再好嘅伴侶,咁亦係byebye嘅節奏。
 
曾經女人有三從四德,男人亦有佢照顧妻子一切嘅責任,今日仲有冇女人講三從四德?無,女權至上,講求公平,OK,但同時間女人會要求男人做返當年嘅責任,明顯就係想要權利唔要義務。
 
愛我就應該點點點,女人經常講呢句,係,愛一個人會為佢做好多嘢,但並唔係不停被索要,不停受壓力,而係一種自發自主嘅行為。
 
一個男人愛你,想俾一個家你而努力,係愛情;
一個女人要你有個家先肯同你走落去,係交易;
一對情侶努力建立自己嘅家,係愛情;
一對情侶權衡輕重計算得失,係交易。
 
今日有好多包裝成愛情嘅交易,當供求失衡時,愛情包裝融化,露出赤裸裸嘅醜惡交易,因財失義就係咁。
 
點解誠哥咁到肉?因為佢清楚你講樓,就只係一宗交易,做生意,有邊個心水清得過誠哥?
 
如果你將愛情當成交易,呢單Deal,Deal or not Deal,This is not a question,而你要清楚,Deal啫,唔係做人世,Deal完散場。
 
蔣薇
www.fb.com/maydreaming

COMMENT