2018/03/29

《毛記,有乜咁巴閉》

100most_J_1024
 
網上資料圖片
 
聯交所俾到咩感覺你?一班西裝友好嚴肅好認真咁幾百萬上落,賣盤買殼收風報料,但毛記上市,Dickson著住T-shirt牛仔褲背囊仲要攝衫,一身秋葉原毒撚裝扮行上大舞台,絕對係一個時代嘅見證。
 
「睇吓你本雜誌仔幾時執」當年蔣議員批死毛記走唔遠,完全係一個老屎忽富二代心態去睇人,但今日聯交所敲嘅鐘,就好似一鎚敲落蔣議員嘅面。
 
毛記點解會上到市?最簡單一點係,佢知道年輕人想要乜!絕大部份老屎忽都唔會重視年輕人市場,無消費力、窮、無錢,呢幾個原因令年輕人長期被忽視,而呢班眼中只有錢嘅人更唔會睇得起年輕人想法,因為佢哋打滾多年,唔用腦都講得出一堆主觀廢話,更係有佢講,從唔會聽人意見。
 
長期被忽視嘅年輕人,終於喺網路抬頭,而毛記亦正係第一班夠貼地夠痴線嘅媒體,以無厘頭做賣點,因為年輕人有時都係想笑吓放鬆吓,但無厘頭背後,亦加插唔少嚴肅話題,九淺一深咁插入年輕人腦海入面,除咗笑料,原來人仲要知道好多社會大事,比起一個老師同你傾訴,由一個年輕媒體道出,更令人入耳。
 
林日曦上市前一篇自白,講佢成世人都面對一盤又一盤嘅冷水,但冷水令佢更清醒,令佢更強大。
 
做人最難係乜?就係知道自己想點,我哋求外人去話比自己聽呢個決定係對係錯,慢慢會走錯方向,甚至偏離自己初衷,最後一事無成。
 
自己想點?有好多人一世都唔知;知想點,你需要諗點去得到,往往方法都係困難,令好多人卻步;有人前進,但仆咗街,你企唔企得返起身?諗唔諗到自己錯乜?之後可以點做?到你真係搵出自己風格長處時,就係一鳴驚人之時。
 
曾經我喺街聽過一個阿叔講毛記上市,一句:「挑,都唔知有乜咁巴閉!」
 
Well,我知,評馬唔需要跑得快過馬,但阿叔個問題係乜?咪就係唔知佢有乜咁巴閉囉!呢個世界唔會死錯人,企得喺呢度,絕對有過人之處,而你睇唔出呢點,咪就係你目光有問題,所以你咪要喺街度扮嘢講兩句酸到喊嘅嘢囉!
 
見住毛記幾位老細上市,有一門無人不知嘅事業,我望望佢哋個年紀,再望望自己,當自己到佢哋咁大時,自己會係點?
 
蔣薇
www.fb.com/maydreaming

COMMENT