2018/04/06

《那些年的ICQ網戀中伏事件》

2018_04_06_蔣薇MenClub
 
網上資料圖片
 
最近有條瘋傳嘅聲帶,有位女士搵冷氣師傅報價,同時發出陣陣曖昧聲音,聽聲真係無得彈,但後來一張聲稱係事主嘅相,將大家拉返現實,可以用聖人模式去分析事件,而我,就諗返起一件往事……
 
當年仲有ICQ,大家由朝到晚都「啊噢」「啊噢」,當時有位朋友,朋友不是我,佢網交咗一位叫小草嘅女仔,一傾電話不得了,把聲已經甜到令人有無限幻想,咁有日佢哋決定見面,而我,就係一個被拉嚟做電燈膽壯膽嘅小毒男。
 
見面地點係彩虹,地鐵站行上少少嘅遊樂場,當年剛剛有手提電話,但仲未有Facebook/WhatsApp/IG,連ICQ好似都無send相功能,所以見面前連PS同照騙都無,好Pure好純情。
 
而一見面,迎頭有兩個女仔喺度等,一個幾OK,另一個極唔OK,好似冷氣女事主咁款,唔駛問我都知我個Fd咩心情,一個天堂一個地獄,根據墨菲定律,凡事無咁簡單,而你擔心嘅事係必然發生,一開口,小草確定,我唔明咁大份點解可以叫小草,用同類去講,應該係芭蕉葉!
 
我朋友都有幾分姿色,小草一睇就開心都不得了,當正佢係男朋友咁攬手攬頸,我就好似見到大內密探零零發嘅皇上咁,睇住佢呆滯嘅樣,我完全無想拯救佢嘅意慾,所謂既來之、則安之、死者已矣。
 
今時今日,仲會唔會有中伏?有乜交友軟件唔會有相?唔會Post相?唔好話相,片都大把,你未見過個人都知佢大概係咩樣,PS又好,整容又好,經驗多少少你都好易睇得出,所以今日你出得嚟都唔會差太遠。
 
九十後零零後唔會明咩叫,維他奶為記,亦唔會明旺地恆等呢類暗號,更唔會知道見面係一場幾鬥智鬥力嘅表現,約喺商場地下,你再係樓上望落去,見到人影、打電話,再睇下對方係咩樣,如果唔對路就走人,唔聽電話,留低對方係商場度喊。諗返起,我都覺得殘忍,但你唔咁做就係對自己殘忍。
 
故事結局係點?朋友最後當然唔會揀小草啦,反而溝咗佢個FD,而呢段戀情都只不過係維持咗個幾月。
 
人生總要中幾次伏,好多年睇返轉頭,就會覺得係一種經歷同笑料,有時知得太清楚、講得太白,其實無咁有驚喜。
 
蔣薇
www.fb.com/maydreaming

COMMENT