2018/04/13

《百萬,還是富翁?》

maxresdefault
 
圖片來源: Cap TV
 
今時今日喺香港,擁有百萬仲能稱得上係富翁嗎?
 
小時候睇百萬富翁,答對全數題目先可以攞上百萬,算係風光算係成就。
 
依家,一百萬,連車位都未必可以全數比晒,更唔洗講擁有一個家。
 
小時候覺得百萬係一筆龐大數字,但身邊朋友一個一個買樓、結婚、生仔,金錢係以幾十萬幾十萬去計。
 
香港人要過活,邊個都要曾經擁有過百萬,只係你花喺咩地方。
 
曾經戲說有一百萬就辭職環遊世界,嗰時仲係中學生,仍然覺得百萬係筆了不起嘅數字,今日比一百萬你,你有勇氣去辭職?環遊世界?不如攞錢再賺錢。
 
你可能認為我離地,但事實係事實,有一百萬總比無一百萬強,但遠遠稱不上係富翁,就好似學歷通漲一樣,以前一個大學生係光宗耀祖,今日你唔係大學生就係有辱家門,非要到碩士博士你先算係讀過書。
 
如果擁有百萬係富翁,香港就係一個喺縮水樓住咗幾百個富翁,每日富翁要出門返工,仲要坐公共交通工具,晚上食唔晒就聽日帶飯,喺公司被千萬富翁及億萬富翁勞役而唔敢出聲。
 
居屋開售,幾乎身邊男士朋友都想碰碰運氣,但就算抽得到,自己積蓄夠咩?攞得起「政府」資助房屋嘅首期?
 
女生有樓有高潮,男人又何嘗不想置業?不為炒賣,只求一個安居之所,可惜,無父幹母幹,自己賺幾萬元都唔敢講可以比得起……
 
香港,可能係世界上最多百萬「富翁」嘅地方,可笑嘅係,呢啲富翁係一貧如洗。
 
黃子華開楝篤笑,大批黃牛炒得慶起,以前iPhone出新機,大家亦炒個不亦樂乎,連毛記上市,也大炒特炒,但偏偏樓市炒得如此可怕,都要默默承受。
 
望著新發售嘅居屋,單身男士苦笑,自己仲唔夠努力?樓市問題政府唔解決,自己好憤怒,最後亦只能夠每日返工放工,等住自己嘅儲蓄到達百萬,成就富翁夢。
 
年輕時,睇住個樓市鬧;到依家,自己無氣再鬧。
 
早前毛記上市,抽唔抽?年輕時,我好討厭炒賣,但今日,我只想講句:If you cannot beat them, join them。
 
蔣薇
www.fb.com/maydreaming

COMMENT