2018/04/20

《三十歲,先係男人嘅起步》

2018_04_20_May Menclub
 
網上資料圖片
 
早幾日喺街聽到一個貌似廿五六嘅男仔講:「唉,老喇,無以前咁有魄力去衝……」
 
我當時暗笑一下,乜依家咁快就可以看透世事,再望望自己已步入三字頭,諗諗身邊朋友,我可以好肯定講,三十歲,先係男人嘅開始!
 
唔知你身邊多唔多三字頭嘅朋友,我身邊通常都係,大家有個共通點,就係搏晒命去做,雖然有肚腩,通頂都無以前咁快復原,但大家眼中都有團火,不其然開始人生另一個階段。
 
三字頭係多事之年,好多人結婚、生小朋友、工作停滯,家人亦多病痛;再望到後生後來居上,我哋不其然有一種壓力,究竟應該點好?老?我哋從唔認老,但我哋認清一個事實,三字頭唔衝,就再無機會去衝!
 
衝嘅意思係乜?證明自己,有邊個唔想有一番成就,加上有家室壓力,荷包真係乾到極點,迫到你要賣命去做去搵錢,但有乜可能話搵就搵?大家會思考我哋點搵更多錢,會就自己最擅長嘅方向去諗,慢慢你就會搵到自己最有價值係乜?而呢種價值,決定你可以走得幾遠。
 
好多人話男人遲熟,我認同,因為男人係一個大細路,我哋嚮往自由、追逐夢想,對於責任,男仔會逃避,但到咗一個年紀,你終於選擇去承擔更多責任時,你就係一個男人,好似進化咁,你成功去到另一個層次,由量變,到質變。
 
今日我哋身邊朋友,衝之餘,唔再覺得係蝕做,因為一切一切都係為自己而做,一切一切都係最後機會,由朝做到晚,做到一樣自己都覺得出色嘅事。就好似細個覺得行山係一種苦事,點解咁辛苦要去行到想死?但人大咗你會知道自己行山,係為咗最美嘅景色,你開始懂得吃苦,亦愛上吃苦,因為你發現,苦,唔緊要,最緊要係你知道為咗乜去吃苦。
 
三字頭嘅朋友,加油,唔單止你一個人去衝,呢度成班兄弟,都衝緊,你並不孤單。
 
起跑線重要嗎?唔重要,重要嘅係,你點去跑!
 
當你意識到,跑步唔係為咗贏人哋,而係自己前進時,咩起步線,咩終點,又有乜好介懷。
 
蔣薇
www.fb.com/maydreaming

COMMENT