2018/04/27

《搬出嚟住先掛住屋企飯》

2018_04_27_may menclub
 
網上資料圖片
 
男人終有一日會離開自己屋企,雖然呢件係好嚮往嘅事,但有時候係要離開先知道自己留戀咩。
 
出嚟做嘢,好多時都好夜返,又或者約朋友有節目,住家飯?唔食喇,話晒讀書嗰陣都食足咁多年,比起大魚大肉重味多調味嘅飯菜,媽媽煮嘅低油低鹽低糖養生餐,的確唔太啱胃口。
 
仲好記得當年中學第一餐出去食嘅Lunch,我食咗個星州炒米,簡直驚為天人,原來世界上仲有一種咁嘅味道,我亦深知我阿媽唔會煮到呢種食物,自此以後,我就不停開發味蕾,嘗盡中西美食。
 
阿媽煮飯煲湯有份執著,就係要健康,好多食店都會標榜自己健康,但你知,健康又好食嘅嘢係唔存在嘛,我試過飲碗青紅蘿白湯係甜甜地,係薏米啊!佢加咗薏米,認真九唔搭八,我問點解,佢話下火有益所以加,但佢無諗過個味道夾唔夾;又有一次飲湯成陣藥材味,佢話係湯,加咗唔知乜藥材,話有益,其實我唔介意飲藥或者涼茶,但可唔可以湯還湯、藥還藥呢?比起標榜健康食店,我媽嘅出品一定健康到盡,因為係無味道。
 
笑料仲有好多,讚好食結果一個星期都食同一款餸就唔再講,例如佢將出前一丁麻油味公仔麵嘅湯同麻油換成自己湯底,話有益;又或者出街食完話好易整,最後又整咗自家健康版嘅菜。
 
喺屋企食,好有貧富宴感覺,因為你無得揀,上枱時先知乜事,所以一個家,最少都有一套拿手小菜係大家都會接受,例如我屋企嘅炒菜心同蟹柳炒蛋,唔會有伏,味道大路,亦唔會做到乜手腳。
 
搬出去之後,你唔再喺呢個家,亦唔再被要求食飯,無人等你飲湯,但你亦開始懷念某些味道,唔知點解自己用電飯煲煮嘅飯,硬係同屋企煮嘅有出入……係米?係水?定係飯煲問題?而你嘗試炒個菜心亦點都炒唔出想要嘅感覺。
 
久而久之,你會打個電話俾阿媽,話今晚我想返嚟食飯。點解要咁講?因為你搬走之後,已經唔再assume你會返嚟食,除非特別通知,當你坐低,食住一份熟悉味道時,你會發現好食以外,有種味道,叫做熟悉。
 
蔣薇
www.fb.com/maydreaming

COMMENT