2018/05/04

《婚後嘅功課》

2018_05_03_may menclub
 
網上資料圖片
 
性,永遠都係男人之間嘅題材,結婚嘅朋友愈來愈多,九叔一個接一個出現,大家有份成熟之外,仲多咗一啲唏噓……
 
曾經我覺得,婚後生活就可以無限啪啪啪,以前礙於名份,煩惱地方,想啪又唔想太張揚同夾硬,唯有去多幾次旅行,你估男人真係咁喜歡同女友去旅行?一要plan嘢,二要就佢,三要陪行街,四要睇佢心情,為乜?為嘅就係夜晚嘅一刻溫存。
 
最近講起度蜜月,最佳選擇一定係馬爾代夫啦,椰林樹影下獨立屋,對住個海無嘢做,唯有就係啪啪啪,點解要蜜月去?仲後生,仲係最情濃之時,咁你先唔會悶親;如果係老咗先去?無力之餘又厭咗,只可以上映老人與海劇目。
 
而有位朋友,佢竟然喺度蜜月之間,一次都無啪過,雖然佢個蜜月係後補,但都未至於會咁掛?佢解釋話一日要揸幾個鐘自駕遊所以攰,我唔明,因為俾我的話,我幾攰都好,一聽到可以啪就精神。
 
原來唔係得佢一個係咁,有幾位已為人夫嘅朋友,同伴侶愈來愈少行埋,甚至有少少交功課嘅感覺。
 
朋友係咁講:「夜夜春色?諗吓好喇。返到屋企,就算唔煮飯你都要洗衫晾衫收衫摺衫、拖地煲水執屋,忙完一輪再沖個涼,都十二點,聽朝返早,仲啪?不如啪粒安眠藥。」咁星期六日唔駛返工有時間可以啪喇掛?「星期日囉,起身唔駛趕,啪完仲可以補眠。」
 
單身嘅朋友聽到呆咗,佢直程覺得喺有陽光嘅時間啪係好不可思議,但原來婚後人夫都變成朝早做功課,可能精神啲掛?
 
如果成為爸爸嘅話就更恐怖,夜晚要湊小朋友已經無得瞓,唔鬧交已經算好,仲想親熱?幾時可以親?中午個仔瞓晏覺嗰陣嗱嗱臨囉。
 
當一個男人,佢唔再為性著迷時,想唔認老都唔得。
 
突然一把謎之聲講:「唔係唔再為性著迷,係唔再為佢著迷啫,你試吓俾個十八廿二年輕貌美,一晚三次無難度啦。」
 
在場人夫們靜咗一靜,唔承認,亦唔否認。
 
究竟,係變態?定係常態?我唔知,呢種話題唔可以去BE講,連MenClub都唔可以,只有你自己喺心入面答自己就可以。
 
蔣薇
www.fb.com/maydreaming

COMMENT